بەریتانیا: قۆناغێکی نوێی مامەڵەکردن لەگەڵ ڕووسیا دەستپێدەکات

ئاڤا نیوز

سەرۆکوەزیرانی بەریتانیا هەڕەشەی سەپاندنی سزای قورس بەسەر ڕووسیادا دەکات و قۆناغێکی نوێ لە مامەڵەکردن لەگەڵ ڕووسیا ڕادەگەیەنێت.

وێنە گەورەکە: دوای ئەوەی دۆناڵد ترەمپ، سەرۆکی ئەمریکا بێئومێدبوونی خۆی لە ڤلادیمێر پووتین، سەرۆکی ڕووسیا دەربڕی بە هۆی هێرشی بەردەوامی ڕووسیا و کۆنترۆڵکردنی دوو شاری دیکەی ئۆکراینا لە سنووری هەرێمی دۆنێتسک، بەریتانیا و یەکێتی ئەورووپا پلانی دەستپێکردنی قۆناغێکی نوێیان لەگەڵ ڕووسیا هەیە.

لێدوانی فەرمی: کەیر ستارمەر، سەرۆکوەزیرانی بەریتانیا ئەمڕۆ پێنجشەممە لە لێدوانێکی ڕۆژنامەوانیدا ڕایگەیاند: ڕووسیا بەردەوامە لە هێرشەکانی بۆ سەر خاکی ئۆکراینا، هیچ هەوڵێکی دیپلۆماسی و سزای ئابووری ڕاینەگرتووە، بۆیە دەبێت قۆناغێکی نوێ لە مامەڵەکردن لەگەڵ ڕووسیا دەستپێبکات و سزاکان و مامەڵەی دەوڵەتان ئەم قۆناغەی ئێستا تێبپەڕێنن و سزای زۆر تووند بگرنەبەر تاوەکو ڕاگرتنی یەکجاری ڕووسیا لە هێرشەکانی.

زانیاریی زیاتر: ئەمڕۆ لە پاریس کۆبوونەوەی سەرکردەکانی ئەورووپا بە بەشداری ڤۆلۆدیمێر زیلێنسکی، سەرۆکی ئۆکراینا بەڕێوەدەچێت و دوای کۆبوونەوەکە پەیوەندی ڤیدیۆیی بە دۆناڵد ترەمپ، سەرۆکی ئەمریکاوە دەکەن و تاوتوێی ئەنجامی کۆبوونەوەکە دەکەن بۆ سزادانی ڕووسیا.