فیلمێک لەبارەی غەززە زیاتر لە 23 خولەک چەپڵەی بۆ لێدەدرێت

ئاڤا نیوز

لە فێستیڤاڵی فیلمی ڤێنیس لە ئیتاڵیا، فیلمێک لەسەر غەززە نمایش دەکرێت و زۆرترین چەپڵەی ناو مێژووی سینەمای بۆ لێدەدرێت. دوای نمایشی فیلمەکە لەلایەن ئامادەبووانەوە زیاتر لە 23 خولەک چەپڵەی بۆ لێدرا و دەستخۆشی لێکرا.

ئەوەی پێویستە بیزانیت: فیلمەکە دیکۆدرامییە و ناوی 'دەنگی هیند ڕەجەب'ـە و باس لە چیرۆکی دوا ساتەکانی کوژرانی هیند ڕەجەب، منداڵێکی شەش ساڵانی غەززە دەکات کە لە ڕووداوێکی ڕاستەقینەوە وەرگیراوە.

چیرۆکی سەرەکی: ڕۆژی 29ی 1ی 2024 تانکێکی سوپای ئیسرائیل ئۆتۆمۆبێلێکی مەدەنی لە ناو شاری غەززە دەکاتە ئامانج و تۆپبارانی دەکات. "بەر لە هێرشەکە کچێکی 14 ساڵان تەلەفۆن بۆ هیلال ئەحمەڕ دەکات و دەڵێت فریامان بکەون؛ تیمەکانی فریاکەوتنی تەندروستی دەچن بۆ شوێنی ڕووداوەکە، بەڵام تانکێکی ئیسرائیلییەکان ڕێگریی لە تیمەکان دەکات، تەقە لەوانیش دەکات و دووان لەوانیش دەکوژێن و ناهێڵن لە ئۆتۆمۆبێلەکە نزیک بکەونەوە.

تیمەکە لە دوورەوە هاوار دەکەن داخۆ کەس لە ناو ئۆتۆمبێلەکە ماوە؟ کچێکی بچکۆلە بە ناوی هیند ڕەجەب وەڵامیان دەداتەوە، دەڵێت "هەموو خێزانەکەم مردوون و منیش لەناو تەرمەکاندام، وەرن فریام بکەون زۆر دەترسم"، بەڵام ئیسرائیل هەر ڕێگری دەکات و ناهێڵێت کەس بچێت بە هانای منداڵەکەوە و ئەویش دەکوژن.

دوای 12 ڕۆژ هێزەکانی ئیسرائیل لەوێ نامێنن، بەڵام کاتێک تیمەکان دەچن و دەبینن تەواوی خێزانە حەوت کەسییەکە، بە هیندیشەوە، کوژراون.

کاریگەریی و لێکەوتەکانی: ئەم ڕووداوە دەنگدانەوەیەکی زۆری لەسەر ئاستی جیهان درووست کرد و خەڵکی غەززە و جیهان هیچکات لە یادیان نەکرد، لەبەرئەوە فیلمێکی لەسەر بەرهەمهێنراوە و زۆرترین دەستخۆشیشی لێکراوە.