ترەمپ ناوی وەزارەتی بەرگری وڵاتەکەی بۆ وەزارەتی جەنگ گۆڕی

ئاڤا نیوز

سەرۆکی ئەمریکا بڕیاریدا ناوی وەزارەتی بەرگری وڵاتەکەی بکاتە وەزارەتی جەنگ، دەشڵێت، وەزارەتی جەنگ بۆ دۆخی ئێستای جیهان گونجاوترە.

وێنە گەورەکە: گۆڕینی ناوی وەزارەتی بەرگری بۆ وەزارەتی جەنگ، بەشێکە لە هەوڵێکی فراوانتری ئیدارەی ترەمپ بۆ ئامادەکردنی سوپایەکی بەهێز و سەرکەوتووتر لە جیهاندا.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، پێم وایە ناوی وەزارەتی جەنگ گونجاوترە، بەتایبەتی لەبەر ڕۆشنایی ئەو دۆخەی ئێستا لە جیهاندا هاتووەتە ئاراوە.

زانیاریی زیاتر: ترەمپ وتیشی، "ئێمە جەنگی جیهانی یەکەم و دووەم و هەموو شتێکمان پێش ئەوە و لە نێوان ماوەی هەردوو وەزارەتی بەرگری و جەنگ بردووەتەوە و گۆڕینی ناوی وەزارەتی بەرگری پەیامی سەرکەوتنە، ئێمە خاوەنی بەهێزترین سوپا و چەکین لە جیهاندا."

ئەمەش بزانە: لە دوای سەربەخۆیی ئەمریکا تا ساڵی 1947، وەزارەتی جەنگ لە حکومەتی ئەمریکادا هەبوو، بەڵام لەو ساڵە ئیدارەی هاری ترومان بڕیاریدا ناوەکە بگۆڕدرێت و دوای دوو ساڵ، بەپێی یاسایەکی کۆنگرێس گۆڕدرا بۆ وەزارەتی بەرگری.