فیدان: هەوڵەکانی ئەمریکا بۆ پەکخستنی بەشداریی مەحموود عەباس لە کۆبوونەوەی نەتەوەیەکگرتووەکان قبووڵکراو نییە

ئاڤا نیوز

 

هاکان فیدان، وەزیری دەرەوەی تورکیا، ڕەخنەی تووندی لە بڕیاری هەڵوەشاندنەوەی ڤیزەی ئەمریکا بۆ مەحموود عەباس، سەرۆکی فەڵەستین گرت، کە بڕیار بوو بەشداریی 80هەمین کۆبوونەوەی گشتیی نەتەوەیەکگرتووەکان بکات لە نیویۆرک. فیدان گوتی، "بەبێ فەڵەستینییەکان قسە لەسەر پرسی فەڵەستینییەکان ناکرێت."

 

وێنە گەورەکە: ڕێککەوتی 29ـی 8ـی 2025 وەزارەتی دەرەوەی ئەمریکا پێدانی ڤیزای بە ئەندامانی ڕێکخراوی ڕزگاریخوازی فەڵەستین و دەسەڵاتی فەڵەستین قەدەغەکرد، بەو پێیەش بەرپرسانی فەڵەستین بە مەحموود عەباس، سەرۆکی فەڵەستینەوە ناتوانن سەردانی ئەمریکا بکەن.

 

چیرۆکی سەرەکی: لە سەردانێکیدا بۆ فیدراسیۆنی ڕۆژنامەگەریی تورکیا لە ئەنقەرە، فیدان وەڵامی پرسیاری ڕۆژنامەنووسانی دایەوە سەبارەت بە هەڵوەشاندنەوەی ڤیزەی بەرپرسانی فەلەستین. ئەو ئاماژەی بە هەستیاری دۆخەکە دا و گوتی: "لە دەستپێکی شەڕەوە لە غەززە، ئێمە زۆر بە جددی کار لەسەر ئەم پرسە دەکەین."

لێدوانی فەرمی: سەبارەت بە هەڵوەشاندنەوەی ڤیزەی مەحموود عەباس، فیدان گوتی، "ئەوان ناڵێن فەڵەستین وەک دەوڵەت بەشداری نەکات، وەک دەزانن فەڵەستین هەمیشە نوێنەری خۆی لەوێ [نەتەوەیەکگرتووەکان] دەبێت و ئەوان ناتوانن ڕێگریی لەمە بکەن. بەڵام هەڵوەشاندنەوەی ڤیزەی مەحموود عەباس واتای ئەوە دەدات کە 'ئەوان نایانەوێت مەحموود عەباس' بەشداری بکات."

وەزیری دەرەوەی تورکیا دووپاتی کردەوە، هەموو دەوڵەتان لە کۆبوونەوەی گشتیی نەتەوەیەکگرتووەکاندا، کە ساڵانە لە مانگی ئەیلوولدا دەکرێت، لێدوانی خۆیان لەسەر پرسە هەنووکەییەکان پێشکەش دەکەن. ئەو ڕایگەیاند، ئەمساڵ بڕیاردراوە کۆنفرانسێکی تایبەت بە فەڵەستین لە نەتەوەیەکگرتووەکان ئەنجامبدرێت بە سەرکردایەتیی هەندێک وڵات و پاڵپشتیی تورکیا.

پەیوەست بە هەڵوێستی وڵاتانی ئەوروپا لەبارەی داننان بە دەوڵەتی فەڵەستین، فیدان ئاشکراشی کرد، هەندێک وڵاتی ڕۆژئاوا، بەتایبەتی فەرەنسا و بەلجیکا، کە هێشتا فەڵەستینیان وەک دەوڵەت نەناساندووە، هەنگاو دەنێن بۆ ئەوەی "فەڵەستین وەک دەوڵەتێک بناسن." ئەو جەختی لەوە کردەوە کە لەژێر ڕێنمایی ڕەجەب تەیب ئەردۆغان، سەرۆککۆماری تورکیا، بە جددی کار لەسەر ئەم پرسە دەکەن.

لەلایەکی دیکە: وەزیری دەرەوەی تورکیا داوای لە وڵاتانی ڕێکخراوی هاریکاریی ئیسلامی و وڵاتانی عەرەبی کرد کاردانەوەیان هەبێت و ئەم پرسە بە بێدەنگی تێپەڕ نەبێت. ئەو ئاشکرای کرد کە چەند کۆبوونەوەیەک لەگەڵ بەرپرسانی فەلەستین، میسر، سعودیە، قەتەر، ئوردن و عومان ئەنجامدراوە و گەیشتوونەتە ئەو ئەنجامەی کە "ئەم بەرنامەیە لە نیویۆرک پەک نەخرێت و دانپێدانانی دەوڵەتی فەڵەستین ئەنجام بدرێت."