ئەردۆغان و میری قەتەر: هێرشەکەی ئیسرائیل پێشێلی سەروەریی قەتەری کردووە

ئاڤا نیوز

 

ڕەجەب تەیب ئەردۆغان، سەرۆککۆماری تورکیا لە پەیوەندییەکی تەلەفۆنیدا لەگەڵ شێخ تەمیم بن حەمەد ئال سانی، میری قەتەر سەرکۆنەی هێرشەکەی ئیسرائیلی کرد و سەرەخۆشی خۆی بۆ کەسوکاری ئەو کەسانە دەربڕی کە لە هێرشەکەدا کوژران.  

 

چیرۆکی سەرەکی: ڕۆژی سێشەممە ئیسرائیل لەڕێگەی فڕۆکەی جەنگییەوە ژمارەیەک بارەگای سەرکردەکانی حەماسی لە دەوحەی پایتەختی قەتەر کردە ئامانج، بە گوێرەی میدیاکانی ئیسرائیل لە هێرشەکاندا کۆبوونەوەیەکی سەرکردایەتیی حەماسیش کراوەتە ئامانج.

 

ڕاگەیێنراوی فەرمی: بەپێی ڕاگەیێنراوێکی فەرمانگەی پەیوەندییەکانی سەر بە سەرۆکایەتیی کۆماری تورکیا کە لە تۆڕی کۆمەڵایەتی (NSosyal) بڵاو کراوەتەوە، ئەردۆغان پەیوەندییەکی تەلەفۆنی لەگەڵ میری قەتەر، شێخ تەمیم بن حەمەد ئال سانی ئەنجام دا. لە پەیوەندییەکەدا هێرشی ئیسرائیل بۆ سەر شاندی دانوستانکاری حەماس و هەنگاوە هاوبەشەکان تاوتوێ کرا.

 

- بە گوێرەی ڕاگەیێنراوەکە ئەردۆغان سەرکۆنەی هێرشەکەی ئیسرائیلی کردووە کە مەبەست لێی "تەشەنەپێکردنی پێکدادان و ناسەقامگیرییەکانە لە ناوچەکەدا و پێشێلی سەروەریی وڵاتی دۆست و هاوپەیمان، قەتەری کردووە".

 

لە پەیوەندییەکەدا، ئەردۆغان سەرەخۆشی خۆی بۆ کەسوکاری ئەو کەسانە دەربڕیوە کە لەو هێرشەکدا کوژراون و ڕایگەیاندووە، "تورکیا بە هەموو توانایەکەوە لە پاڵ گەل و دەوڵەتی قەتەردایە".

 

لەلایەکی دیکە: هەردوو سەرکردە سووربوون لەسەر ئەوەی کە درێژە بە هاوکارییەکانیان بدەن بۆ دەستبەجێ ڕاگرتنی کۆمەڵکوژییەکان لە غەززە.

 

ئەوەی پێویستە بیزانیت: سوهەیل هندی، بەرپرسی سیاسیی بزووتنەوەی حەماس ڕایگەیاند، لە هێرشەکەدا کوڕ و یاریدەدەری خەلیل حەیای سەرۆکی شاندی دانوستانکاری حەماس لەگەڵ دوو کەسی دیکەدا کوژراون، بەڵام سەرکردایەتیی بزووتنەوەی حەماس لە هەوڵی تیرۆرکردنەكە ڕزگاریان بووە.