عێراق کوشتنی "سەرکردەیەکی باڵای" داعش لە سووریا ڕادەگەیێنێت

ئاڤا نیوز

ڕۆژی هەینی، هاوپەیمانیی نێودەوڵەتی بە هەماهەنگیی و هاوکاریی دەزگای دژەتیرۆری عێراق، یەکێک لە سەرکردە دیارەکانی ڕێکخراوی داعشی لە نێوخۆی سووریا بە ناوی "عەبدولرحمان حەلەبی" بە ئامانج گرت.

چیرۆکی سەرەکی: بەرەبەیانی ڕۆژی هەینی لە ناو خاکی سووریا، دژەتیرۆری عێراق و هێزەکانی هاوپەیمانیی نێودەوڵەتی دژی داعش لە عێراق و سووریا ئۆپەراسیۆنێکیان ئەنجامدا، ئەوەش  لە ئەنجامی چاودێریی وردی هەواڵگری و پاڵپشتیی دادوەریی عێراق لە ماوەی چەند مانگێکدا و دوای دەستنیشانکردنی شوێنی ئەو سەکردەیەی داعش هێزەکانی هاوپەیمانیی نێودەوڵەتی بە فڕۆکەی سەربازی بۆردوومانیان کرد.

ڕاگەیێنراوی فەرمی: لە ڕاگەیێنراوێکدا دەزگای دژەتیرۆری ڕایگەیاند: سەرکەوتنی ئۆپەراسیۆنێکی نوێی چۆنایەتی ڕادەگەیەنین کە تیرۆریست 'عومەر عەبدولقادر بەسام' ناسراو بە "عەبدولرحمان حەلەبی"، یەکێک لە سەرکردە دیارەکانی ڕێکخراوی تیرۆریستی داعش بە ئامانجگیرا، ئۆپەراسیۆنەکە بە هەماهەنگی لەگەڵ هێزەکانی هاوپەیمانی نێودەوڵەتی ئەنجامدراوە

زانیاریی زیاتر: ئەم لێدانە زیانێکی "ستراتیژیی گەورە" بە باندە تیرۆریستیەکان گەیاند، چونکە نەهێشتنی حەلەبی دوای زنجیرەیەک ئۆپەراسیۆنی سەرکەوتوو دێت لە ماوەی دوو مانگی ڕابردوودا کە لە ئەنجامدا زیاتر لە شەش سەرکردەی پلە باڵاکانی داعش کوژران.

ئەوەی پێویستە بیزانیت: "حەلەبی" پۆستی بەرپرسی ئۆپەراسیۆن و ئاسایشی دەرەکی بوو، بەرپرسیار بوو لە پلاندانان و سەرپەرشتیکردنی "ویلایەتە دوورەکان"، ئەمە جگە لەوەی دەستی ڕاستەوخۆی لە تەقاندنەوەی باڵیۆزخانەی ئێران لە لوبنان و هەوڵدان بۆ ئەنجامدانی ئۆپەراسیۆنە تیرۆریستییەکانی دیکە لە ئەوروپا و ئەمریکا هەبووە، کە بەهۆی هەوڵی وردی هەواڵگرییەوە پووچەڵکرانەوەتەوە.