قەتەر داوا لە ئیسرائیل دەکات لەبەرامبەر هێرشەکەی بۆ سەر دەوحە داوای لێبووردن بکات

هەواڵ
1 کاتژمێر لەمەوپێش

شەیری بکە لە:

قەتەر داوا لە ئیسرائیل دەکات لەبەرامبەر هێرشەکەی بۆ سەر دەوحە داوای لێبووردن بکات

دیمەنی ئەو ناوچەیەی کە هێرشی کرایە سەر لەلایەن ئیسرائیل. وێنە؛ AP

ئاڤا نیوز

قەتەر داوایکردووە بە فەرمی ئیسرائیل لەبەرامبەر هێرشەکەی بۆ سەر دەوحە داوای لێبووردن بکات بۆ ئەوەی دەست بە نێوەندگیرییەکانی بکاتەوە لەبارەی ڕێککەوتنی ئازادکردنی بارمتەکان.

زانیاریی بەدەستهاتوو: کەناڵ 12ـی ئیسرائیل بڵاویکردووەتەوە، ئەم داوایە ڕاستەوخۆ لەلایەن تەمیم بن حەمەد ئالسانی، میری قەتەرەوە کراوە، لە کاتی سەردانەکەی مارکۆ ڕوبیۆ، وەزیری دەرەوەی ئەمریکا بۆ قودس لەگەڵ نەتانیاهۆ باسکراوە.

لەلایەکی دیکەوە: دوو سەرچاوەی ئاگادار بە کەناڵە ئیسرائیلییەکەیان ڕاگەیاندووە، قەتەر بە مەرجی ئەوەی ئیسرائیل داوای لێبووردنی لێ بکات ئامادەیە ڕۆڵی خۆی وەک نێوەندگیرێک لە نێوان ئەوان و حەماس بۆ ئازادکردنی بارمتە ئیسرائیلییەکان بگێڕێت.

ئەوەی پێویستە بیزانیت: قەتەر لە سەرەتای جەنگی غەززەوە نێوەندگیرێکی سەرەکی بووە لە نێوان ئیسرائیل و حەماسدا. ئیدارەی ترەمپ پێی وایە بەبێ نێوەندگیری قەتەر، گەیشتن بە ڕێککەوتنێک بۆ ئازادکردنی بارمتەکان و کۆتاییهێنان بە جەنگ زۆر دژوار دەبێت.

ئەوەی لەبارەیەوە دەگوترێت: سەرچاوەیەکی ئاگادار لە وردەکارییەکان، ڕایگەیاندووە کە قەتەرییەکان ڕەنگە ڕازی بن بە داوای لێبوردنی ئیسرائیل بۆ کوشتنی ئەفسەرێکی ئاسایشی قەتەری لە هێرشەکەیاندا، قەرەبووکردنەوەی خێزانەکەی و بەڵێندان بەوەی لە داهاتوودا پێشێلی سەروەری قەتەر نەکەن.

باکگراوند: لە هێرشەکەی ئیسرائیل بۆ سەر دەوحە، پێنج ئەندامی حەماس و ئەفسەرێکی ئاسایشی قەتەری کوژران. دوای هێرشەکەش، قەتەر ڕایگەیاند کە ڕۆڵی نێوەندگیریی لە نێوان ئیسرائیل و حەماس لەسەر ڕێککەوتنی ئازادکردنی هەموو بارمتەکان و کۆتاییهێنان بە جەنگ ڕادەگرێت.