دوو فیلمی کوردی بەشداریی فێستیڤاڵیکی نێودەوڵەتی لە بەرازیل دەکەن

ئاڤا نیوز

دوو فیلمی سینەمایی کوردی لە فێستیڤاڵێکی نێودەوڵەتی لە وڵاتی بەرازیل بەشدارن و کێبڕکێ لەگەڵ 60 فیلمی جیهانی بۆ وەرگرتنی خەڵات دەکەن.

وێنە گەورەکە: فێستیڤاڵەکانی فیلم هەوڵێکن بۆ نیشاندانی توانا هونەرییەکان لەسەر ئاستی جیهان. لەهەمان کاتدا دەرفەتێکن بۆ زیاتر ئاشنابوون بە هونەر و کلتووری وڵاتان.

لێدوانی فەرمی: جوبرائیل ئەبوبەکر، دەرهێنەری فیلمی "دەریای ئومێد" کە یەکێکە لە بەشداربووانی فێستیڤاڵی نێودەوڵەتی کۆرتیس ئیتاپۆلیس لە وڵاتی بەرازیل، بە ئاڤا میدیای ڕاگەیاند، پێنج هەزار و 700 فیلم لە 120 وڵاتی جیاوازەوە پێشکەش بە فێستیڤاڵەکە کران، بەڵام 140 فیلم نمایش دەکرێن، لەو ژمارەیەش تەنیا 60 فیلم پێشبڕکێی وەرگرتنی خەڵات دەکەن.

دەرهێنەری فیلمەکە دەڵێت: لەسەر ئەرکی خۆم فیلمەکەم بەرهەمهێناوە، لەگەڵ سامی کاکە کە دەرهێنەری فیلمی "بێ دەنگی چیاکان"ـە و کەسێکی دیکە بەشدارین و بۆ ماوەی پێنج ڕۆژ میوانی فێستیڤاڵەکە دەبین، سێ ڕۆژیش داوەتی پارێزگاری ئیتاپۆلیس کراوین.

ئەمەش بزانە: فێستیڤاڵەکە ئەمساڵ خولی دووەمیەتی و لە 25-9-2025 دەستیپێکردووە  تا 30-9-2025 بەردەوام دەبێت.