عێراق؛ لە یەک مانگدا دەست بەسەر چارەگە تۆنێک ماددەی هۆشبەردا گیراوە

ئاڤا نیوز

بەڕێوەبەرایەتی کاروباری ماددە هۆشبەرەکان سەر بە وەزارەتی ناوخۆی عێراق ڕایدەگەیێنێت، لەم مانگەدا دەست بەسەر 250 کیلۆگرام ماددەی هۆشبەردا گیراوە و 59 بازرگانیش دەستگیرکراون.

وێنە گەورەکە: بەدەر لە بەکارهێنەرانی؛ چەندین تۆڕی ناوخۆیی و نێودەوڵەتیی تایبەت بە ماددەی هۆشبەر و قاچاخچی لە عێراقدا چالاکن، بەپێی نوێترین ڕاپۆرتی نەتەوەیەکگرتووەکان کە لە ڕێگەیەوە هۆشداری دابوو، خەریکە عێراق دەبێتە ناوەندێک بۆ بڵاوبوونەوەی ماددە هۆشبەرەکان لە ناوچەکەدا.

ڕاگەیێنراوی فەرمی: بەگوێرەی ڕاگەیێنراوی بەڕێوەبەرایەتییەکە، "لە مانگی ئەیلوولی ئەمساڵدا دەستبەسەر 250 کیلۆگرام ماددە هۆشبەردا گیراوە، هاوکات 59 بازرگانی نێودەوڵەتی کە مەترسیدارترین بازنەکانی قاچاخچێتی و پەرەپێدان و بازرگانییان پێکدەهێنا، دەستگیر کراون".

لەهەمان کاتدا: بەگوێرەی کاروباری ماددە هۆشبەرەکان، "جگە لە دەستبەسەرداگرتن و دەستگیرکردنی بازرگانان، زیانێکی زۆر بە تۆڕەکانی قاچاخچیێتی گەیێنراوە".