حەرەمی گوندەکانی سنووری هەولێر فراوان دەکرێت

ئاڤا نیوز

بەبڕیاری ئەنجوومەنی وەزیران لە ڕێگەی لیژنەیەکەوە، ئاسانکاری بۆ زیادکردنی حەرەمی گوندەکان دەکرێت بەمەبەستی ئاوەدانی و خزمەتگوزاریی زیاتر. سەدان گوند داوای فراوانکردنی حەرەمەکانیان کردووە، لەلایەن لیژنەکەوە بەدواداچوونی لەسەر دەکرێت.

وێنە گەورەکە: کابینەی نۆیەمی حکومەتی هەرێمی کوردستان، بەشێوەیەکی ڕژد کار لەسەر گەیاندنی خزمەتگوزاریی بە گوند و ناوچە دوورە دەستەکان کردووە بەو ئامانجەی ئاوەدان ببنەوە و کەرتی کشتوکاڵ و ئاژەڵداری ببوژێتەوە.

زانیاریی زیاتر: نووسراوێک لە بەرواری 03-09-2025 لە دیوانی ئەنجوومەنی وەزیران دەرچووە کە واژۆی د.ئومێد سەباحی پێوەیە، لیژنەیەک پێکهاتووە نوێنەری ئەنجوومەنی وەزیران، وەزارەتی ناوخۆ، وەزارەتی شارەوانی، بەڕێوەبەرایەتیی گشتیی کشتوکاڵی هەولێر، بەڕێوەبەرایەتیی گشتیی شارەوانی هەولێر و نەخشەدانانی ئاوەدانی، بەمەبەستی لێکۆڵینەوە و پێداچوونەوە بە داواکاری ئەو گوندانەی داوای فراوانکردنی حەرەمیان کردووە.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "لیژنەکە کاراکراوە، دەستکراوە بە ڕێککارەکان، ئامانجمان ئەوەیە سرووشتی گوندەکان پارێزگاری لێبکرێت، ئەو هەنگاوەش دەبێتە هۆکارێک بۆ ئاوەدانی زیاتر و بەرهەمی ناوەخۆیی ئاژەڵی و کشتوکاڵیش زیاتر دەبێت."

ئەمەش بزانە: فراوانکردنی حەرەمی گوندەکان چۆنە؟؛ بۆ نموونە گوندێک ڕووبەرەکەی 300 دۆنم زەوییەم، بەڵام حەرەمەکەی 30 دۆنمە دوای ئەوەی فراوانکردنی حەرەم پەسەند کرا، ڕووبەرێکی زیاتر لەو گوندە بەڕووی ئاوەدانی دەکرێتەوە.