بڕی پێدانی بەنزین بە نرخی پاڵپشتیکراو زیاد دەبێت

ئاڤا نیوز

چەند ڕۆژێکە بەهۆی کەمبوونەوەی بڕی بەنزین بەنرخی پاڵپشتیکراو بۆ بەنزینخانەکان، نرخی بەنزینی نۆرماڵ بۆ هەر لیترێک 40 بۆ 60 دیناری هاتووەتە سەر، بڕیارە لە سبەیەوە بڕەکە زیاد بکرێت و ژمارەی بەنزیخانەکانیش زیاتر دەبێت.

وێنە گەورەکە: دوو پاڵاوگەی هەرێمی کوردستان نەوتی خام لە کێڵگەکانی نەوت وەردەگرن و بەنزین بە نرخی پاڵپشتیکراو بۆ پارێزگاکان دابین دەکەن، بەسەر بەنزینخانەکان دابەش دەکرێت لیتری بە 750 دینار بە شوفێران دەدرێت.

لێدوانی فەرمی: سالار محەممەد، لێپڕسراوی بەشی پشکنین لە بەڕێوەبەرایەتیی نەوت و کانزاکانی هەولێر؛ بە ئاڤای گوت، "لە سبەی سێشەممەوە بڕی بەنزین زیاتر دەبێت و بەسەر 30 بەنزینخانە دابەش دەکرێت، تاوەکو ئەمڕۆ 520 هەزار لیتر بەسەر 15 بەنزینخانە دابەش دەکرا، سبەی دەبێتەوە یەک ملیۆن و 80 هەزار لیتر بۆ 30 بەنزیخانە."

زانیاریی زیاتر: زیادبوونی ژمارەی ئەو بەنزیخانانەی کە بەنزینی 750 دیناری دەدەن بە شوفێران کاریگەری ڕاستەوخۆی لەسەر بەنزینی نۆرماڵ دەبێت، بەشێوەیەک دوای کەمبوونەوەی ژمارەی بەنزیخانەکان نرخی هەر لیترێک بەنزینی نۆرماڵ لە 875 دینار و 890 دینار بۆ 900 و 940 دینار بەرز بووەوە.