نزیکەی حەوت مانگە بەرهەم ساڵح نەگەڕاوەتەوە سلێمانی

ئاڤا نیوز

د. بەرهەم ساڵح، سەرۆککۆماری پێشووتری عێراق و کەسایەتی دیاری سیاسی، ماوەی نزیکەی حەوت مانگە نەگەڕاوەتەوە سلێمانی و ئێستاش لە ئەمریکایە. 

چیرۆکی سەرەکی: دوایین دەرکەوتنی د. بەرهەم ساڵح لە سلێمانی، لە ناوەڕاستی مانگی نیسانی ئەمساڵ بوو، کاتێک لە دیداری زانکۆی ئەمریکی لە "سولی فۆرم" بەشداری کرد. لەو کاتەوە چووەتە ئەمریکا و نەگەڕاوەتەوە.

تەنانەت لە دوایین ئاهەنگی دەرچوونی زانکۆی ئەمریکی سلێمانیشدا بەشدار نەبووە، لەکاتێکدا بەهۆی پەیوەندییە نزیکەکانی لەگەڵ زانکۆکە، چاوەڕوان دەکرا ئامادە بێت.

زانیاریی تایبەت: بەپێی زانیارییەکانی ئاڤا، لە بەهاری ئەمساڵدا پەیوەندییەکی تەلەفۆنی تووند لەنێوان د. بەرهەم ساڵح و بافڵ تاڵەبانیدا ڕووی داوە، لەوکاتەوە بەرهەم ساڵح چووەتە ئەمریکا و نەگەڕاوەتەوە.

ئەوەی پێویستە بیزانیت: د. بەرهەم ساڵح کەسایەتییەکی ناسراوە لەسەر ئاستی جیهان و خاوەنی پەیوەندییەکی بەهێزە. ئەو دۆستێکی نزیکی مام جەلال بوو و لە سەردەمی ئەودا جێگری سکرتێری گشتی یەکێتی نیشتمانی کوردستان بوو.

جگە لەمەش، چەندین پۆستی باڵای حکومی وەرگرتووە، لەوانەش سەرۆکوەزیرانی کابینەی شەشەمی حکومەتی هەرێمی کوردستان و دواتریش سەرۆککۆماری عێراق لە خولی پێشوو.

لەلایەکی دیکەوە:  د. بەرهەم ساڵح ئێستا بۆ پۆستێکی جیهانی کاندیدە، ئەویش پۆستی کۆمیسیاری باڵای نەتەوە یەکگرتووەکانە بۆ کاروباری پەنابەران (UNHCR). ئەمەش ڕەنگە هۆکارێکی دیکە بێت بۆ مانەوەی لە ئەمریکا و چالاکییە نێودەوڵەتییەکانی.