وەزیری کارەبا: نزیکەی دوو هەزار مێگاوات بۆ ناو تۆرەکانی کارەبای نیشتمانی زیاد بووە

ئاڤا نیوز

وەزیری کارەبای حکومەتی هەرێمی کوردستان دەڵێت، لە کابینەی نۆیەمدا نزیکەی دوو هەزار مێگاوات کارەبا بۆ ناو تۆرەکانی کارەبای نیشتمانی زیاد بووە، هەروەها باسی ئەو چاکسازییانەش دەکات کە لە تۆڕەکانی کارەبا کراون و بەهۆیەوە توانراوە کارەبای نیشتمانی زیاد بکرێت.

چیرۆکی سەرەکی: ئەمڕۆ شەممە، بە ئامادەبوونی کەمال محەممەد، وەزیری کارەبای حکومەتی هەرێمی کوردستان و ئومێد خۆشناو، پارێزگاری هەولێر و ژمارەیەک بەرپرسی ئیداری و کارگێڕی، وێستگەی کارەبای ئۆمەراوە لە قەزای قوشتەپە کرایەوە.

لێدوانی فەرمی: کەمال محەممەد، وەزیری کارەبا ڕایگەیاند، لە کابینەی نۆیەمی حکومەتی هەرێمی کوردستان "توانیومانە هەزار و 840 مێگاوات کارەبا لەناو تۆرەکانی کارەبای نیشتمانی زیاد بکەین".

ژمارەکانی وادەڵێن: بەپێی وتەی وەزیری کارەبا، زیادکردنەکە بەمجۆرە بووە:

٠ 750 مێگاوات کارەبا لە بازیان.
٠ 500 مێگاوات کارەبا لە خورمەلە.
٠ 300 مێگاوات کارەبا لە خەبات.
٠ 165 مێگاوات کارەبا لە گەرمیان.
٠ 29 مێگاوات لە هەولێر، 29 مێگاوات لە سلێمانی و 29 مێگاواتی دیکەش لە دهۆک
٠ 38 مێگاواتی کارۆئاوی لە دێرەلۆک.

زانیاریی زیاتر: بەگوتەی وەزیری کارەبا، ئەنجامدانی پڕۆژەکانی کارەبا لە هەرێمی کوردستان سێ بوار لەخۆ دەگرێت ئەمانەن:

بواری گواستنەوە: لەو کابینەیەدا 61 پڕۆژەی وێستگەی کارەبا بۆ گواستنەوەی کارەبا بۆ ناو تۆڕەکانی نیشتمانی بە گوژمەی 372 ملیۆن دۆلار ئەنجامدراون، تەنیا لە هەولێر 31 وێستگەی کارەبا بە گوژمەی 233 ملیۆن دۆلار ئەنجامدراون.

بواری دابەشکردن: لە بواری دابەشکردن تەنیا لە سنووری پارێزگای هەولێر هەزار و 68 پڕۆژە بە گوژمەی 106 ملیار دینار جێبەجێکراون.

بورای کۆنترۆلکردن: لە کابینەی نۆیەم زیاتر لە 600 هەزار سمارت میتر لەناو تۆری کارەبای هەولێر دانراون، بۆیە لە هەرێمی کوردستان و دەستپێکیش لە هەولێر کارەبا بووە 24 کاتژمێری.