ئەندامانی حەشدی عەشایەری لە ئەنبار: گوشارمان لەسەرە دەنگ بە کاندیدی حەشدی شەعبی بدەین

ئاڤا نیوز

 

ژمارەیەک لە ئەندامانی هێزەکانی حەشدی عەشایەری کە سوننەن لە پارێزگای ئەنبار گلەیی ئەوە دەکەن ڕووبەڕووی "فشار و زۆرەملێکردن" بوونەتەوە بۆ دەنگدان بە یەکێک لە کاندیدەکانی سەر بە حەشدی شەعبی.

 

چیرۆکەی سەرەکی: ئەمڕۆ یەکشەممە كاتژمێر 7ـی بەیانی پرۆسەی دەنگدانی تایبەت بۆ هەڵبژاردنی پەرلەمانی عێراق دەستیپێکرد؛ لەسەرانسەری عێراق  و هەرێمی کوردستان یەک ملیۆن و 313 هەزار و 859 کەس مافی دەنگدانیان لە دەنگدانی تایبەت بۆ هەڵبژاردنی پەرلەمانی عێراق هەیە.

ئەوەی پێویستە بیزانیت؛ ژمارەیەک لە ئەندامانی حەشدی عەشایەری بە میدیاکانی عێراقیان ڕاگەیاندووە، پێنج ڕۆژ پێش ئێستا فەرمان دەرچووە بۆ ئەوەی سەرجەم ئەندامان بەبێ جیاوازی بگەڕێنەوە دەوامەکانیان، بە بیانووی ڕێکخستنی کارەکە و بەشداریکردن لە دەنگدانی تایبەت، بەڵام مەبەستی ڕاستەقینە ئاڕاستەکردنی ئەندامان بوو بۆ دەنگدان بە کاندیدێکی دیاریکراو کە نوێنەرایەتی هێزەکانی حەشدی شەعبی دەکات.

 

بەگوتەی ئەو ئەندامانەی حەشدی عەشایەری، فەرمان و جموجۆڵەکان بەشێوەیەکی ڕێکخراو و لەژێر چاودێریی فەرماندە مەیدانییەکان بەڕێوەچوون، تەنانەت "لە ئەگەری پابەندنەبوون بە ڕێنماییەکانی هەڵبژاردن هەڕەشە لە بەشێک لە ئەندامانمان کراوە."

 

قسەی ئەم ئەندامانە هاوکاتە لەگەڵ سکاڵای هاوشێوەی ژمارەیەک لە ئەندامانی وەزارەتی ناوخۆی عێراق سەبارەت بە ڕووبەڕووبوونەوەی "فشار و زۆرەملێکردن" لەلایەن بەشێک لە ئەفسەران و فەرماندە ئەمنییەکانەوە بۆ دەنگدان بە بەرژەوەندی لیست و لایەنی دیاریکراو.

 

بە تەنیشت ئەم بابەتەوە؛ ڕۆژێک پێش دەستپێکردنی دەنگدانی تایبەت، وەزارەتی ناوخۆی عێراق دووپاتی کردەوە، ئەندامانی دەزگا ئەمنییەکان ئازادن دەنگ بە کێ دەدەن و هیچ لایەنێک مافی ئەوەی نییە گوشار، ئاراستەکردن، یان دەستوەردان بکات. هەر کەسێک ڕووبەڕووی هەر هەوڵێکی فشارکردن بووەوە لەلایەن فەرماندە، ئەفسەر و کارمەندەکانەوە دەتوانێت سکاڵا لە نزیکترین فەرماندەیی یان لەڕێگەی ژمارە 911 تۆمار بکات.