ترەمپ: بە ئاسانترین شێوە دەتوانم جەنگی ئۆکراینا کۆتایی پێبهێنم

ئاڤا نیوز

سەرۆكی پێشووی ئەمریكا پێشنیازێک بۆ چارەسەری جەنگی ئۆكراینا دەكات و دەڵێت، دەتوانێت بە ئاسانترین شێوە كۆنترۆڵی جەنگەکە بكات.

وێنە گەورەكە: چەند جارێکە دۆناڵد ترەمپ پێشنیازی کۆتایهێنان بە جەنگەکە دەخاتەڕوو، ئەمەش لەکاتێکدایە کە هەڵبژاردنی سەرۆکایەتی ئەمریکا نزیکە و ترەمپ بۆ دژایەتیکردنی جۆ بایدن، سەرۆکی ئەمریکا، بانگەشەی ئەوە دەکات کۆنترۆڵکردنی جەنگەکە لای ئەو ئاسانە و دەتوانێت ڕووسیا و ئۆکراینا قایل بکات.

ئەوەی لەبارەیەوە دەگوترێت: ڕۆژنامەی واشنتن پۆستی ئەمریکی ڕایگەیاندووە، سەرۆكی پێشووی ئەمریكا بە نهێنی بە کەسانی نزیکی خۆی ڕاگەیاندووە بە فشار خستنەسەر کیێڤ بۆ دەستبەردابوون لە بەشێك لە خاكەكەی دەتوانێت وابکات جەنگەکە کۆتایی بێت. 

ئەوەی پێویستە بیزانیت: بەپێی پێشنیازەکەی ترەمپ، ئۆکراینا نیمچە دوورگەی کریمیا و ناوچەی سنووری دۆنباس دەداتە دەست ڕووسیا. پێشتر ترەمپ گوتبووی، دەتوانێت بە یەک ڕۆژ کۆتایی بە جەنگەکە بهێنێت.

 

ئەمەش بزانە: پێشتر ڤۆلۆدمیر زیلێنسكی، سەرۆکی ئۆکراینا، گوتبووی، قبوڵی ناكات یەک مەتر لە خاكی وڵاتەكەی لە ژێر دەستی پوتین بمێنێتەوە، دەبێت بە تەواوەتی ئازادبێت و هەموو شتێك لە ژێر كۆنترۆڵی دەوڵەتدا بێت.