چەند پرۆژەیەکی خزمەتگوزاری لە دهۆک جێبەجێ دەکرێن

ئاڤا نیوز

وەزارەتی شارەوانی و گەشتوگوزار ڕایگەیاند، زیاتر لە 797 ملیۆن دینار بۆ جێبەجێكردنی ژمارەیەك پرۆژەی خزمەتگوزاری لە سنووری سەرۆكایەتیی شارەوانیی دهۆك و بەڕێوەبەرایەتیی گشتیی شارەوانییەكانی شارەکە ئامادەکراوە.

بۆچی گرنگە: پرۆژەكان كاریگەرییان لەسەر پەرەپێدانی خزمەتگوزارییەكانی سنووری شاری دهۆك و پارێزگاکە دەبێت.

ڕاگەیێنراوی فەرمی: وەزارەتی شارەوانی و گەشتوگوزار دەڵێت، ڕەزامەندییان داوە بە خەرجكردنی 406 ملیۆن و 588 هەزار دینار بۆ جێبەجێكردنی پرۆژەی دروستكردنی شەقام لە كەرتی 10ی دلب بۆ قۆناغی دووەم، هاوکات شەقامێک و ئاوەڕۆ لە گەڕەکی شەهیدانی سێمێل بە گوژمەی 230 ملیۆن و 837 هەزار و 750 دینار دروست دەکرێت.

زانیاری زیاتر: وەزارەتەکە 29 ملیۆن و 53 هەزار دیناری تەرخانکردووە بۆ دروستكردنی ئاوەڕۆ لە گەڕەكی 11ی ئادار لە سەرسنك لەگەڵ 130 ملیۆن و 854 هەزار دینار بۆ جێبەجێكردنی پرۆژەی دروستكردنی شەقام لە سنووری شارەوانیی مسیریكێ.

ئەوەی پێویستە بیزانیت: زۆربەی ئەو پرۆژانە بە ڕێژەی 100% لە داهاتی فرۆشتنی زەوی لە سنووری سەرۆكایەتیی شارەوانییەکان جێبەجێ دەکرێن.