ترەمپ: تەقەکەرەکەی واشنتن باجێکی قورس دەدات

ئاڤا نیوز

دۆناڵد ترەمپ ڕووداوەکەی شەوی ڕابردووی واشنتن "بە کردەوەیەکی تیرۆرستی" ناو دەبات و  جەخت لەو دەکاتەوە ئەوە کەسەی ئەم کارەی ئەنجامداوە بە "تووندترین شێوە سزا دەدرێت".

 

چیرۆکی سەرەکی: شەو ڕابردوو لە نزیک کۆشکی سپی ڕووداوێکی تەقەکردن ڕوویدا و بەوهۆیەوە دوو پاسەوانی نیشتمانی بە سەختی بریندار بوون.

لێدوانی فەرمی: دۆناڵد ترەمپ سەرۆکی ئەمریکا دەڵێت، ئەو "ئاژەڵ"ـەی تەقەی لە پاسەوانانی نیشتمانی کردووە و دووانیان بەسەختی بریندارن، خۆیشی بریندارە، باجێکی قورس دەدات بەهۆی ئەو کارەی کە کردوویەتی.

 

دەشڵێت، "بەگوێرەی ئەو زانیارییانەی کە هەن دەتوانم بڵێم تۆمەتبارەکە دەستگیرکراوە و کەسێکی بیانییە و لە ئەفغانستانەوە لە ساڵی 2021  هاتۆتە ناو وڵاتەکەمانەوە، ئەمریکا هەرگیز ناچێمێتەوە، هاوکات بەهۆی ئەم ڕووداوەوە وەزارەتی جەنگم ڕاسپاردووە بۆ ناردنی  500 سەربازی دیکە بۆ واشنتن.

 

دۆناڵد ترەمپ دووبارە ڕەخنەی لە سیاسەتەکانی ئیدارەی بایدن گرت و گوتی "ئێستا دەبێت هەموو کەسێکی بێگانە بپشکنین کە لە ئەفغانستانەوە لە ژێر دەستی بایدن هاتۆتە ناو وڵاتەکەمانەوە".

 

کاریگەری و لێکەوتەکان: لە ژێر ڕۆشنایی ئەم ڕووداوەدا، ئیدارەی ترەمپ بڕیاریداوە تاماوەیەکی نادیار مامەڵەکردن لەگەڵ سەرجەم داواکارییەکانی کۆچبەری پەیوەست بە ئەفغانییەکان ڕابگیرێت.