هۆشیار زێباری: هێرشەکەی سەر کۆرمۆر بە مووشەکی گراد کراوە

ئاڤا نیوز

ئەندامێکی مەکتەبی سیاسی پارتی "گرووپە میلیشیاکان" تۆمەتبار دەکات و  هێرشەکەی سەر کۆرمۆر بە تاقیکردنەوەیەکی گرنگ بۆ محەممەد شیاع سوودانی دەزانێت، ئاشکراشی دەکات هێرشەکە بە مووشەکی "گراد" کراوە. 

چیرۆکی سەرەکی:  هۆشیار زێباری، ئەندامی مەکتەبی سیاسی پارتی دیموکراتی کوردستان، گرووپە چەکدارەکانی بە ئەنجامدانی هێرشەکەی سەر کێڵگەی غازی کۆرمۆر لە سلێمانی تۆمەتبار کرد و ئاشکرای کرد کە هێرشەکە لە ڕێگەی مووشەکی "گراد"ـەوە لە میحوەری خورماتووەوە ئەنجام دراوە، ئامانجیش لێی تێکدانی ئابووری و ژێرخانی هەرێمی کوردستانە.

پەیامی فەرمی: هۆشیار زێباری لە تۆڕی کۆمەڵایەتی ئێکس نووسیویەتی: " دەرفەتێکی زێڕین لەبەردەم حکومەتەکەی سوودانییە بۆ سەپاندنی کۆنترۆڵی خۆی و سزادانی تاوانباران، ئەمەش چانسی دووبارە کاندیدبوونەوەی بۆ ویلایەتی دووەم بەهێز دەکات."

- زێباری جەختی لەوە کردووەتەوە، "هێرشەکە بەڵگەیە لەسەر ئەوەی حکومەت کۆنترۆڵی بەسەر ئەو گرووپانەدا نییە، بەڵام سزادانی ئەنجامدەرانی ئەمجارە دەتوانێت وەرچەرخانێک بێت بۆ سەلماندنی دەسەڵاتی حکوومەت".