هەوراز گوڵپی خەڵاتێکی نێودەوڵەتی لە ئەمریکا دەباتەوە

ئاڤا نیوز

گرووپی میدیایی ئاڤا بە خۆشحاڵییەوە ڕایدەگەیەنێت کە ئەستێرەی ژمارە یەکی کوردستان هەوراز گوڵپی، توانی خەڵاتی نێودەوڵەتی شۆرتی Shorty Impact Awards لە ئەمریکا بباتەوە، خەڵاتەکە تایبەتە بە هەواڵ و میدیای کاریگەر.

ئاڤا میدیا لە گەشتی هەواڵەکانی سەعات 7:00ی هەوراز گوڵپی، بە فایلی خەڵک کە رۆژانە چەندین کێشە و داواکاری دەگەیەنرێت و راستەوخۆ چارەسەر دەکرێن، بەشداری پێشبڕکێکەی کرد و خۆشبەختانە توانیمان خەڵاتەکە بە دەستبهێنین. ئەوەی جێگای خۆشحاڵییە نەک تەنیا لەلایەن دادوەرانی خەڵاتەکەوە بەڵکو فایلی خەڵک زۆرترین دەنگی بینەرانی خەڵاتەکەشی بەدەستهێناوە.

دادوەرانی خەڵاتەکە دوای بەخشینی بە هەوراز گوڵپی سەرسامی خۆیان بەو بینەر و کاریگەرییە زۆرەی نیشانداوە و چیرۆکی ئەو کەسانەی دێنە ئاڤا و راستەوخۆ کێشەکانیان بە هەوراز گوڵپی دەگەیەنن بۆ ئەوەی چارەسەر بکرێ سەرنجی ڕاکێشاون، هەر ئەمەش وایکردووە هەوراز گوڵپی تاکە بەربژێری خەڵاتەکە بێت لە بواری هەواڵ و میدیایی و رکابەری نەبێ لەکاتێکدا میدیای گەورەی ناوچەکە و جیهانیش لە کێبڕکێدابوون و ساڵی ڕابردوو تۆڕی میدیایی جەزیرە خەڵاتەکەی بردووەتەوە.

ئاڤا میدیا ئەم سەرکەوتنە گەورەیە لە خۆی و تەواوی کارمەندان و بینەرانی پیرۆز دەکات کە لە ماوەی ساڵێکی تەمەنیدا ئەمە شەشەم خەڵاتی نێودەوڵەتییە بە دەستی بهێنێت، ئەمەش دەیسەلمێنێت کە ئاڤا میدیا پڕبینەرترین و کاریگەرترین میدیای کوردستانە و هەر وەکو دروشمەکەمان نەکراوە و نەبینراوە. لە خەڵاتی نێودەوڵەتی گرنگتر بۆ ئاڤا خەڵکە و بەڵێن دەدەین بەردەوام لەگەڵ خەڵک بین.


بەستەری بینینی براوەی خەڵاتی نێودەوڵەتی شۆرتی Shorty Impact Awards