زانکۆ تایبەتەکان؛ گرێ کوێرەی نێوان هەردوو حکومەتی کوردستان و عێراق

ئاڤا نیوز

هەردوو حکومەتی هەرێمی کوردستان و عێراق دان بە زانکۆ تایبەتەکانی یەکتری ناکەن و چارەنووسی سەدان قوتابی لەم نێوەندەدا ماوەتەوە، لە دوایین هەڵویستی حکومەتی فیدراڵی، وەزیری خوێندنی باڵای عێراق ئاشکرای کرد هێشتا پرسەکە بە هەڵپەسێردراوی ماوەتەوە و جەختی لە پێویستیی چارەسەرکردنی کردەوە.

وێنە گەورەکە: وەزارەتی خوێندنی باڵای هەرێمی کوردستان تاوەکو ئێستا بڕیاری نەداوە دان بە زانکۆ تایبەتەکانی عێراقدا بنێت، وەکو کاردانەوەیەک بەرامبەر ئەوە وەزارەتی خوێندنی باڵای فیدراڵی لە ساڵی ڕابردوو بڕیاریدا دانپێدان بە زانکۆ تایبەتەکانی هەرێمی کوردستان هەڵبوەشێنێتەوە.

لێدوانی فەرمی: نەعیم عەبوودی، وەزیری خوێندنی باڵا و توێژینەوەی زانستیی فیدراڵی ڕایگەیاند: زیاتر لە نووسراوێکمان بۆ وەزارەتی خوێندنی باڵای هەرێمی کوردستان ناردووە بۆ چارەسەرکردنی ئەم پرسە و تۆپەکە لە گۆڕەپانی ئەو وەزارەتە دایە، بۆیەش ئێمە بەهەمان شێوە دان بە زانکۆکانی کوردستان نانێین و پێویستە ئەم پرسە چارەسەر بکەین.

لەلایەکی دیکەوە: سەرچاوەیەک لە وەزارەتی خوێندنی باڵای هەرێمی کوردستان بە ئاڤای ڕاگەیاند: لە ساڵی 2015ـەوە حکومەتی هەرێمی کوردستان مامەڵە ئەو لەگەڵ ئەو زانکۆیانە ناکات بەهۆی ئەوەی چەندین تێبێنیی زانستی و ئەکادیمیمان لەسەر هەن، دواتر لە ساڵی 2024ـدا حکومەتی عێراق هەمان هەڵوێستی بەرامبەر زانکۆ تایبەتەکانی کوردستان بگرێتەبەر.

ئاماژەی بەوەشدا، "بابەتەکە لە وەزارەتی خوێندنی باڵا تاتوێ دەکرێت، بەڵام دیارنییە کەی چارەنووسی پرسەکە یەکلایی دەکرێتەوە".

ئەوەی پێویستە بیزانیت: هەرێمی کوردستان دانپێدانانی بە زانکۆکانی "جەعفەری سادق، قەڵەم، کیتاب، نور و حەدبا" هەڵوەشاندووەتەوە کە دەکەونە پارێزگاکانی کەرکووک و مووسڵەوە، لە بەرامبەردا وەزارەتی خوێندنی باڵای عێراق بڕیاری دانپێدانانی بە زانکۆ تایبەتەکانی هەرێمی کوردستانی هەڵوەشاندەوە.