وەزارەتی کارەبا: هیچ بەڵگەیەک نییە بیسەلمێنێت هۆکاری ئاگرەکەی بازاڕی قەیسەری کارەبا بێت

ئاڤا نیوز

لیژنەیەکی وەزارەتی کارەبا بۆ لێکۆڵینەوە لە ڕووداوی ئاگرکەوتنەوەی شەوی ڕابردوو سەردانی بازاڕی قەیسەریی هەولێری کردووە، بە گوتەی لیژنەكە " هیچ بەڵگەیەک نییە بیسەلمێنێت کە ڕووداوەکەی شەوی ڕابردوو بە هۆی کارەباوە بووبێت".

چیرۆكی سەرەكی: شەوی ڕابردوو ئاگر لە بازاڕی قەیسەری هەولێر کەوتەوە و دوای سێ کاتژمێر کۆنترۆڵکرا، بەو هۆیەوە 370 دووکان سووتان و شەش کەسیش برینداربوون.

ڕاگەیێنراوی فەرمی: وەزارەتی کارەبا لە ڕاگەیێنراوێکدا ڕایگەیاند: لیژنەی لێکۆڵینەوەی ڕووداوە نەخوازراوەکانی وەزارەتەکەیان، سەردانی  شوێنی سوتانی قەیسەری هەولێریان کردووە، دوای لێکۆڵینەوە سەرەتاییەکان بەڵگەو ئاماژەی وا لەبەر دەستدا نەبوو بەوەی کە هۆکاری سوتانەکە پەیوەندی بە کارەباوە هەبێت. 

زانیاریی زیاتر: لیژنەکە لە هەماهەنگی و هاوکاری بەردەوامدا دەبێت لەگەڵ لیژنەکانی لێکۆڵینەوە و لایەنە پەیوەندارەکانی پارێزگای هەولێر. وەزارەتی کارەبا ئەمەی گوتووە.

لە لایەکی دیکەوە: نەبەز عەبدولحەمید، قایمقامی قەزای ناوەندی هەولێر بە ئاڤا نیوزی گوت: دوو لیژنە بۆ دەستنیشانکردنی زیانەکان و لێکۆڵینەوە لە هۆکارەکەی پێکهێنراون و ڕاپۆرتێک لەبارەیەوە ئامادە دەکرێت، لە ئاگری ئەمشەوی بازاڕی قەیسەری 228 دوکان سوتاون زیانیان پێگەیشتوە لەگەل حەوت کۆگا.