کۆمیسیۆن: دەست بە ئامادەکارییەکان بۆ هەڵبژاردن دەکەینەوە

ئاڤا نیوز 

 

 

کۆمیسیۆنی باڵای هەڵبژاردنەکانی عێراق، جارێکی دیکە کاتێکی نوێ بۆ هەڵبژاردنی پەرلەمانی کوردستان دیاری دەکات و ئێستا سەرقاڵی ئامادەکارییە.

 

وێنە گەورەکە: لەسەر سکاڵای سەرۆکوەزیران بارزانی بۆ گەڕانەوەی کورسیی پێکهاتەکان، ئەمڕۆ دەستەی دادوەریی کۆمیسیۆن و دادگەی فیدراڵی داواکارییەکەیان پەسەند کرد.

 

بۆچی گرنگە: بەپێی بڕیارەکە سەرجەم پێکهاتەکان مافیان دەبێت بەشداریی ‌هەڵبژاردن بکەن. لەگەڵ ئەوەشدا کۆمیسیۆن سەرقاڵی چارەسەری کێشەی پەنجەمۆری دەنگدەرانە کە پارتی وەک مەرج بۆ بەشداریی هەڵبژاردن داینابوو.

 

لێدوانی فەرمی: سەرچاوەیەک لە کۆمیسیۆنی باڵای سەربەخۆی هەڵبژاردنەکانی عێراق بە ئاڤا نیوزی گوت: دوای بڕیارەکەی کۆمسیۆن و دادگەی فیدراڵی، لەگەڵ سەرۆکایەتیی هەرێمی کوردستان کۆ دەبینەوە بۆ ئەوەی جارێکی دیکە کاتێک بۆ هەڵبژاردن دیاری بکرێت.

 

لەلایەکی دیکەوە: بڕیارە سبەی چوارشەممە 22-05-2024، پەرلەمانی عێراق کۆببێتەوە چاوەڕوان دەکرێت دەنگ لەسەر درێژکردنەوەی تەمەنی کۆمیسیۆن بدات بۆ ماوەی شەش مانگ کە تەمەنەکەی تا 7-1-2025 درێژ دەکرێتەوە.

 

زانیاریی زیاتر: دوای دەرچوونی مەرسوومەکە، کۆمیسیۆن چوار مانگی پێویستە بۆ ئەوەی خشتەی کارەکانی خۆی جێبەجێ بکات کە پێک دێت لە دووبارە دەرگاکردنەوە بۆ پێشکەشکردنی لیست و هاوپەیمانی و ناوی بەربژێرەکان و پەسەندکردنیان، هەروەها چاپکردن و ڕاهێنان بە تیمی چاودێری هەڵبژاردن و تێستی ئامێرەکانی پەنجەمۆر.