ژمارەیەک پەنابەری کورد ڕەوانەی ڕواندا دەکرێن

ئاڤا نیوز

حکومەتی بەریتانیا ژمارەیەکی زۆر پەنابەری دەستگیر کردووە کە بڕیار وایە دوای هەڵبژاردنەکانی ئەو وڵاتە بیابنێرێتە ڕواندا، ژمارەیەک لەو پەنابەرانەش کوردن.

وێنە گەورەکە: زیاتر لە سێ هەزار پەنابەر لە بەریتانیا دەستگیر کراون، لەو ژمارەیەش 70 یان کوردن و بڕیارە بنێردرێن بۆ ڕواندا، حکومەتی بەریتانیا سوورە لەسەر جێبەجێکردنی بڕیارەکەی.

ئەوەی پێویستە بیزانیت: هەر پەنابەرێک کە دەستگیر دەکرێت دەخرێتە ناو کەشتییەکەوە، پێی دەگوترێت کەشتی "بی.بی.ستۆکۆڵم" و لەو کەشتییەوە پەنابەران ڕەوانەی ڕواندا دەکرێن.

لێدوانی فەرمی: دەشتی جەمال، سکرتێری فیدراسیۆنی سەرانسەریی پەنابەرانی عێراق بە ئاڤا نیوزی گوت: تا ئێستا هیچ پەنابەرێکی کورد لە بەریتانیا نەنێردراوە بۆ ڕواندا، بەڵام لەو ژمارە پەنابەرە کە دەستگیرکراون ژمارەیەکیان کوردن.

لە لایەکی دیکەوە: ڕۆژی پێنجشەممە 23-5-2024 سەرۆکوەزیرانی بەریتانیا ڕایگەیاند: "ناردنی پەنابەران بۆ ڕواندا تا پاش هەڵبژاردنەکان دوادەخرێت، بەڵام بڕیارەکە جێبەجێ دەکرێت". هەڵبژاردنی گشتیی بەریتانیا بڕیارە لە 04-07-2024 بەڕێوە بچێت.

گۆشەیەکی دیکە: ژمارەیەک پەنابەری کورد دەستگیر کراون و ڕۆژی دووشەممە 27-5-2025 دەگەڕێنرێنەوە بۆ هەرێمی کوردستان.