لە عێراق سیستەمی پێوەری تەكسی دەکەوێتە بواری جێبەجێکردنەوە

ئاڤا نیوز 

وەزارەتی گواستنەوەی عێراق لە سەرەتای مانگی داهاتوو، سیستەمی پێوەری تەکسی(تەکسی مەتر) دەخاتەكار و ئەمەش شوفێرانی تەکسی نیگەران کردووە.

وێنە گەورەکە: دوای ئەوەی لە کۆتایی هەشتاكانی سەدەی ڕابردوو، کارکردن بە پێوەری هەژماری تەکسی(تەکسی مەتر) لە عێراق ڕاگیرا، وەزارەتی گواستنەوەی بڕیاری داوە لە سەرەتای مانگی داهاتوو کار بەو سیستەمە دەستپێبکاتەوە.

لێدوانی فەرمی: "وەزارەتی گواستنەوە هاوکات لەگەڵ راگەیاندنی بەرنامەی ئەلیکترۆنیی تەکسییی نیشتیمانی، کار لەسەر دانانی ڕێنمایی تایبەت دەکات بۆ بەکارهێنانی سیستەمی تەکسی مەتر لە چوارچێوەی یاسای گواستنەوەی سەرنشینان". مەیسەم ئەلسافی، بەڕێوەبەری ڕاگەیاندنی وەزارتی گواستنەوەی عێراق وای گوتووە.

شێوازی جێبەجێکردن: پێوەری هەژماری تەکسی، سیستەمێکە بە گوێرەی مەودا وکات بڕی کرێی تەکسی خاوەن تەکسییەکان دیاری دەکات لە کاتی گواستنەوەی سەرنشینان.

ئەوەی پێویستە بیزانیت: ئەم بڕیارەی وەزارەتی گواستنەوە ناڕەزایەتیی شوفێرانی تەکسی لێکەوتووەتەوە، داوا دەکەن پێش ئەوەی ئەم جۆرە سیستەمانە جێبەجێبکەن ڕێگە و بان و قەرەباڵغی چارەسەر بکرێت.