بەهۆی هەڵبژاردنەوە حکومەتی پاکستان هێڵەکانی پەیوەندی دەپچڕێنێت

ئاڤا دیجیتاڵ

 

بەبەشداری 128 ملیۆن هاووڵاتی هەڵبژاردن لە پاکستان دەستیپێكرد و حکومەت هێڵی پەیوەندی لە سەرانسەری وڵات بڕیوە. کێبڕکێیەکە لەنێوان سەرۆکوەزیرانی پێشوو و نەوەیەکی سەرۆکوەزیرانی پێشووترە.

 

ئەوەی ئێستا ڕوودەدات: ڕۆژی چوارشەممە، دوو تەقینەوەی یەک لەدوای یەک لە پاکستان ڕوویاندا؛ بەپێی زانیارییە سەرەتاییەکان 26 کەس گیانیان لەدەستدا و زیاتر لە 40 کەسی دیکەش برینداربوون. ئەم تەقینەوانە ڕێگریان لە ئەنجامدانی هەڵبژاردنەكان نەكرد و ئەمڕۆ پێنجشەممە، بنكەكانی دەنگدان كرانەوە.

 

بۆچی گرنگە؟ ئەم هەڵبژارنە بۆ پاكستان زۆر گرنگە. کێبڕکێیەکی تووند هەیە لەنێوان نەواز شەریف، بیلاوال بوتۆ زەرداری و عیمران خان، سەرۆکوەزیرانی پێشوو کە ئێستا لە زیندانە. بۆیە پێشبینی دەكرێت زۆرترین هاووڵاتی ئەو وڵاتە بەشداری بکەن.

 

ئەوەی پێویستە بیزانیت: حكومەتی پاکستان لە سەرانسەری وڵاتدا، سەرجەم هێڵەكانی پەیوەندی بڕیوە. پرۆسەکە لە کاتژمێر شەشی بەیانییەوە دەستیپێکردووە و تاوەکو پێنجی ئێوارە بەردەوام دەبێت. 

 

ژمارەكان وادەڵێن: بۆ پێكهێنانی حكومەت پارتەکان لەكۆی 336 كورسیی ئەنجوومەنی نیشتمانی، پێویستیان بە 169 كورسی هەیە. دەنگدەران 266 ئەندام هەڵدەبژێرن و 70 کورسیی ئەنجوومەنەكەش بۆ ژنان و پێکهاتە ئایینەکانی دیکە تەرخانکراوە.