ڕێگە بە کۆمپانیا تۆمار نەکراوەکان نادرێت گەشتیار بهێننە هەرێمی کوردستان

ئاڤا نیوز  

ژمارەیەک کۆمپانیا کە بەشێوەی فەرمی لە حکومەتی عێراق تۆمار نەکراون، پێشتر گەشتیاری خواروو و ناوەڕاستی عێراقیان هێناوەتە هەرێمی کوردستان، لەمەودوا ڕێگەیان پێنادرێت.

وێنە گەورەکە: ساڵانە ژمارەیەکی زۆر گەشتیار لە ناوەڕاست و باشووری عێراق ڕوو لە هەرێمی کوردستان دەکەن، بەشێک لەو گەشتیارانە لە ڕێگەی گرووپی گەشتیارییەوە دێن و ژمارەیەک کۆمپانیای وەهمیش فێڵیان لێدەکەن و پارەی زیادەیان لێ وەردەگرن.

لێدوانی فەرمی: ئەمەل جەلال، سەرۆکی دەستەی گەشتوگوزاری هەرێمی کوردستان بە ئاڤا نیوزی گوت: لەگەڵ دەستەی گەشتوگوزاری عێراق ڕێککەوتوین بۆ ئەوەی ئەو کۆمپانیایانەی کە گەشتیار دەهێننە هەرێمی کوردستان بەپێی ڕێککەوتن بێت و مۆڵەت پێدراو بن لەلایەن حکوومەتی هەرێمی کوردستان و حکومەتی ناوەندییەوە.

لە لایەکی دیکەوە:مەهدی غەزبان، بەڕێوبەری گشتیی فەرمانگەی بنکە گەشتیارییەکان لە گەشتوگوزاری عێراق بە ئاڤا نیوزی گوت: گومانی تێدانییە هەرێمی کوردستان شکۆی گەشتیارانی پاراستووە، دەبێت ڕێگەش بەو کۆمپانیایانە نەدرێت کە گەشتیار فریودەدەن.

ئەوەی پێویستە بیزانیت: لە هەرێمی کوردستان زیاتر لە 800 کۆمپانیای فرۆکەوانی و گەشتیاری هەیە، لە عێراقیش هەزار و 180 کۆمپانیای گەشتیاری هەن کەبەشێوەی فەرمی تۆمار کراون.