لە سنووری هەولێر 95%ی زەوییەکان ئامادەکراون بۆ دابەشکردن بەسەر فەرمانبەران

ئاڤا نیوز

بەڕێوەبەرایەتیی گشتیی شارەوانییەکانی هەولێر ئامادەکاری بۆ دابینکردنی زەوی بۆ  فەرمانبەران دەکات و زۆربەی ڕێکارەکان تەواوکراون.

وێنە گەورەکە: دوای 18 ساڵ پرۆسەی دابەشکردنی زەوی دەستی پێکردووەتەوە و نزیکەی 200 هەزار فەرمانبەر دەگرێتەوە، زیاتر لە سێ مانگیشە دابەشکردنی فۆرم بەسەر وەزارەت و فەرمانگەکان دەستیپێکردووە.

ئەوەی پێویستە بیزانیت: لە سنووری هەولێر دەست بە ڕووپێوکاری و ڕێکخستنەوەی سنووری شارەوانییەکان کراوە، وەک ئامادەکارییەک بۆ دابەشکردنی زەوی بەسەر فەرمانبەران.

لێدوانی فەرمی:  مەریوان هادی، بەڕێوەبەری گشتیی شارەوانییەکانی هەولێر  بە ئاڤا نیوزی گوت، "95% ـی زەوییەکانی هەولێر ئامادەن بۆ دابەشکردن، ئەو 5%ـی ماون سنووری ئەو شارەوانییانەن کە زەوی نەماوە."

چارەسەرەکان: لە هەر شارەوانییەک زەوی نەمابێت لە شارەوانی دراوسێی زەوی بۆ فەرمانبەران دابین دەکرێت، بۆ نموونە ئەگەر لە سنووری شارەوانی کۆڕێ زەوی نەمابێت، لە سنووری شارەوانی شەقڵاوە دابین دەکرێت.

ئەمەش بزانە: ئێستا فەرمانگە و وەزارەتەکان سەرقاڵی ناردنی فۆرمی داواکاری وەرگرتنی زەوین بۆ ئەنجوومەنی وەزیران، دواتر ئاراستەی وەزارەتی شارەوانی دەکرێت و پڕۆسەی دابەشکردنی زەوی دەستپێدەکات.