نزیکەی 25 هەزار تۆن پەتاتە و پیاز هەناردەی ئیمارات و سعوودیە دەکرێت

ئاڤا نیوز  

هەردوو کۆمپانیای ئاورای هەرێمی کوردستان و کۆمپانیای نجوم سەفوانی ئیماڕاتی ڕێکەوتنی هاوبەشیان واژۆکرد بۆ هەناردەکردنی پێنج هەزار تۆن پەتاتەی هەرێمی کوردستان بۆ وڵاتی ئیمارات.

وێنە گەورەکە: کابینەی نۆیەمی حکومەتی هەرێمی کوردستان لە پاڵ پلان و پرۆژەکانی بۆ فرەچەشنکردنی سەرچاوەکانی داهات پاڵپشتی کەرتی تایبەت دەکات لە پەرەپێدانی کشتوکاڵ و بەبازاڕکردنی بەروبومی ناوخۆ لە بازاڕەکانی ناوخۆ و دەرەوە.

لێدوانی فەرمی: ئومێد خۆشناو پارێزگاری هەولێر لە کۆنگرەیەکی رۆژنامەوانیدا گوتی: هەناردەکردنی پەتاتە جێبەجێکردنی ئامانجێکی دیکەی کابینەی نۆیەمە لە فرەچەشنکردنی داهاتی هەرێمی کوردستان و گرنگیدان بە کەرتی کشتوکاڵ.

لە لایەکی دیکەوە: سابیر عەزیز، خاوەنی کۆمپانیای ئاورا گوتی: ساڵی ڕابردوو 13 هەزار و 300 تۆن پەتاتە و پیازمان ڕەوانەی وسعوودیە و ئیماڕات کرد، بۆ ئەمساڵیش پلانمان داناوە ئەو بڕە زیاد بکەین بۆ نزیکەی 25 هەزار تۆن.

بۆچی گرنگە: بەبازاڕکردنی بەروبومی کشتوکاڵی هەرێمی کوردستان لە بازاڕەکانی دەرەوە، هانی جوتیاران دەدات لە زیاترکردنی بەروبومی ناوخۆ.

ئەوەی پێویستە بیزانیت: لە دوو ساڵی ڕابردوودا هەنار و سێو و هەنگوین هەناردەی بازاڕەکانی دەرەوە کراون.