سبەی تەرمی کۆچبەرە کوردەکانی ئیتاڵیا بۆ هەولێر دەگوازرێنەوە

ئاڤا نیوز 

نوێنەری حکومەتی هەرێمی کوردستان لە ئیتاڵیا ڕایگەیاند، تەرمی 13 کۆچبەری کورد لە ئیتاڵیاوە بۆ هەرێمی کوردستان دەگوازرێنەوە.

وێنە گەورەکە: ڕۆژی 17-6-2024 دوو بەلەم لە کەناراوەکانی ئیتاڵیا تێکشکان، کە ژمارەیەکی زۆر کۆچبەریان هەڵگرتبوو، زۆرینەی سەرنشینەکان گیانیان لەدەست داوە و بەشێکیان بێسەروشوێن بوون و لەنێویاندا دەیان کۆچبەری کورد هەبوو.

لێدوانی فەرمی: ڕێزان حەمە ساڵح، نوێنەری حکومەتی هەرێمی کوردستان لە ئیتاڵیا بە ئاڤا نیوزی گوت: لە کاتژمێر 6:30 بۆ 7:30ی ئێوارەی ڕۆژی 2-8-2024، تەرمی 13  کۆچبەری کورد لە ئیتاڵیاوە دەگەیەنرێنە فڕۆکەخانەی نێودەوڵەتی هەولێر.

زانیاریی زیاتر: کۆچبەرەکان خەڵکی هەولێر، ڕانیە، قەڵادزێی تێدایە، هاوکات ژمارەیەک لەوانەش خەڵکی ڕۆژهەڵاتی کوردستانن. نوێنەری حکومەتی هەرێم وا دەڵێت.

ئەوەی پێویستە بیزانیت: حکومەتی هەرێمی کوردستان ئەرکی گواستنەوەی تەرمی کۆچبەرەکانی باشوور و ڕۆژهەڵاتی کوردستانی لە ئەستۆ گرتووە، دوای گەیشتنیان بە هەولێر تەرمی ڕۆژهەڵاتییەکان لەسەر خەرجی حکومەتی هەرێمی کوردستان تا خاڵە سنوورییەکانی نێوان هەرێم و ئێران دەگوازرێنەوە. ئەمەش بە گوتەی ڕێزان حەمە ساڵح.