سەدر لەبارەی غەززە داوایەکی بەپەلە ئاراستەی ئەنجوومەنی ئاسایش دەکات

ئاڤا نیوز

ڕێبەری ڕەوتی نیشتیمانی شیعی داوا لە ئەنجوومەنی ئاسایشی نێودەوڵەتی دەکات بۆ ڕاگرتنی هێرشەکانی ئیسرائیل بۆ سەر کەرتی غەززە، دەستبەجێ بڕیارێک دەربکات و ئیسرائیل پابەندی ڕاگرتنی شەڕ بکات.

وێنە گەورەکە: هێرشەکەی دوێنێی ئیسرائیل بۆ سەر قوتابخانەیەکی شوێنی مانەوەی ئاوارەکان کە نزیکەی 100 کوژراوی لێکەوتەوە، کاردانەوەی نێودەوڵەتی فراوانی لێکەوتەوە و دەیان وڵاتی جیهان سەرکۆنەیان کرد.

ڕاگەیەنراوی فەرمی: موقتەدا سەدر لە پەیامێکدا داوا لە وڵاتانی ئیسلامی و ئاشتیخواز دەکات، فشار بخەنەسەر ئەنجوومەنی ئاسایشی نێودەوڵەتی تا لە کۆبوونەوەی ئەمڕۆدا، بڕیارێکی پابەندکار و دەستبەجێ، بۆ ڕاگرتنی پێشێلکارییە مرۆییەکان بەرامبەر هاووڵاتیانی مەدەنی لە غەززە دەربکات.

زانیاری زیاتر: سەدر بەپێویستی دەزانێت ئەنجوومەنی ئاسایش بەبێ مەرجی پێشوەخت ئیسرائیل پابەندی ڕاگرتنی شەڕ بکات، "چونکە ئەو داواکارییە ڕەنگدانەوەی خواستی هەموو مرۆڤایەتی و گەلانی ئازادیخوازە".

 

باکگراوند: لە 7ـی ئۆکتۆبەری ساڵی ڕابردووەوە، ئیسرائیل بەشێوەی ڕۆژانە ناوچەکانی دانیشتووان لە کەرتی غەززەی فەڵەستین بۆردوومان دەکات و وەک خۆی دەڵێت دەیەوێت حەماس بەیەکجاری لەناوبەرێت، بەهۆی بەردەوامی هێرشەکانیش نزیکەی 40 هەزار کەس کوژراون و  92 هەزار کەسی دیکەش برینداربوون.