فلای بەغداد 80% کارەکانی دەوەستێت و هەشت فڕۆکە لەدەستدەدات

ئاڤا نیوز

هێڵی ئاسمانی فلای بەغداد ڕایگەیاند، بەهۆی بڕیارێکی حکومەتی عێراقەوە، کە بە پشت بەستن بە سزاکەی ئەمریکا بۆ سەر کۆمپانیاکە دەرکراوە، زیانێکی گەورەی بەرکەوتووە و 80%ـی کارەکانی وەستاوە.

بۆچی گرنگە: بەهۆی سزاکەی وەزارەتی گەنجینەی ئەمریکا، بانکی ناوەندیی عێراق هەژمارە بانکییەکانی فلای بەغدادی وەستاندووە لەکاتێکدا سزاکەی ئەمریکا تا 22-03-2024 ناچێتە بواری جێبەجێکردنەوە.

ڕاگەیێنراوی فەرمی: بەهۆی بڕیارەکەی بانکی ناوەندیی عێراقەوە، سەرجەم ئەو کۆمپانیایانەی بەشێوازی قیست فڕۆکەیان فرۆشتووە بە هێڵی ئاسمانی فلای بەغداد، گرێبەستەکانیان هەڵوەشاندووەتەوە بۆیە "هەشت فڕۆکەمان لەدەستداوە و ئێستا تەنیا چوار فڕۆکە ماون"، فلای بەغداد لە ڕوونکردنەوەیەکدا وای گوتووە.

فلای بەغداد دەشڵێت، بانکی ناوەندی عێراق هیچ ئاسانکارییەکیان بۆ ناکات بۆ حەواڵەی بانکی، بۆیە 80%ـی کارەکانیان پەکخراوە.

 

باکگراوند: لە 22-1-2024 وەزارەتی گەنجینەی ئەمریکا بە تۆمەتی بەقاچاغبردنی چەکدار، پارە، هەروەها چەک بۆ سوپای پاسداران لە عێراقەوە بۆ سوریا سزای بەسەر فلای بەغداد دا سەپاند.