حەسەن تۆران: بەردەوام دەبین لە داواکردنی مافەکانمان

ئاڤا نیوز

 

سەرۆکی بەرەی تورکمانی ڕایگەیاند, هێشتا ناوەڕۆکی سکاڵاکەمان لە دادگای فیدراڵی ماوە و بەردەوام دەبین لە داواکردنی مافەکانی گەلی تورکمان.

 

وێنە گەورەکە: ئەمڕۆ 20ی ئابی 2024 دادگەی فیدراڵی سکاڵایەکی بەرەی تورکمانیی ڕەتکردەوە کە داوای کردبوو دادگەکە فەرمانێکی تایبەت دەربکات بۆ پوچەڵکردنەوەی ئەنجامی کۆبوونەوەی ئەنجوومەنی پارێزگای کەرکووک لەبارەی پێکهێنانی حکومەتی خۆجێی ئەو پارێزگایە، ئەمەش کاردانەوەی لایەنە تورکمانییەکانی بەدوا خۆیدا هێنا.

 

لێدوانی فەرمی: حەسەن تۆران، سەرۆکی بەرەی تورکمانی لە کۆنگرەیەکی ڕۆژنامەوانی ڕایگەیاند، متمانەمان بە بێلایەنیی دەسەڵاتی دادوەریی عێراق هەیە و سکاڵاکەمان لەبارەی یاسایی بوونی پێکهێنانی حکومەتی خۆجێی کەرکووک لە دادگای فیدراڵی بەردەوامە.

 

زانیاریی زیاتر: حەسەن تۆران گوتیشی: مەرسومی سەرۆککۆمار لەبارەی دەستبەکاربوونی پارێزگای کەرکووک خێراترین مەرسووم بووە لە پرۆسەی سیاسی بۆ دەستبەکاربوونی پارێزگار لە دوای ساڵی 2003وە.