لە هەولێر "پرۆژەیەکی دەگمەن" بۆ ڕێگریکردن لە لافاو جێبەجێ دەكرێت

ئاڤا نیوز

 

بەشێوەیەکی زانستی و لەڕێگەی پرۆژەیەکی تایبەتەوە، بۆ ڕێگریكردن لە لافاو  لە سنووری هەولێر، باراناو بۆ خەزانەکانی ژێرزەوی دەگوازرێتەوە.

بۆچی گرنگە: لەو شوێنەی پڕۆژەکە جێبەجێ دەکرێت تاوەکو ئاستێکی باش لافاو کەمدەکاتەوە، ئاستی ئاوی ژێرزەویش بەرزدەکاتەوە کە ئێستا بەشێوەیەکی بەرچاو دابەزیوە. پرۆژەکە لە کوردستان مۆدێلێکی نوێیە و پێشتر نەبووە، دەبێتە هەنگاوێک بۆ ئەوەی لە داهاتوودا پەرەی پێبدرێت.

لێدوانی فەرمی: د.کاروان سەباح، بەڕێوەبەری گشتیی سەرچاوەکانی ئاوی هەرێمی کوردستان بە ئاڤا نیوزی گوت: "لەڕێگەی پرۆژەیەکی دەگمەنەوە ئاوی باران و لافاو کۆدەکەینەوە و دەیگوزاینەوە بۆ خەزانەکانی ئاوی ژێرزەوی، ئەمەش بەشێوەیەکی زانستی دەکرێت تاوەکو زیان بە خەزانەکانی ئاوی ژێرزەوی نەگات".

زانیاریی زیاتر: حکومەتی هەرێمی کوردستان بەهاوبەشی لەگەڵ کۆمپانیای دابین گرووپ پرۆژەکە جێبەجێ دەکات و هەفتەی داهاتوو دەستی پێدەکرێت. پرۆژەکە دەکەوێتە گوندی کۆڵەکی بچووک لە باکووری ڕۆژهەڵاتی شاری هەولێر.

ئەمەش بزانە: بەشێکی تێچووی پرۆژەکە حکومەت دوای تەواوبوونی دابینی دەکات،  بڕی 150 ملیۆن دیناریش بە نەختی لەلایەن کۆمپانیای دابین گرووپەوە دابین دەکرێت.