لە هەرێمی کوردستان هەزار و 415 بازرگانی ماددەی هۆشبەر دەستگیرکراون

ئاڤا نیوز

 

لە ماوەی 10 ساڵی ڕابردوودا، بازرگانیكردن و بەکارهێنانی ماددەی هۆشبەر بەڕێژەی سەدا هەزار و 200 زیادیكردووە، سەرپەرشتیاری تۆڕی هەماهەنگی ڕێکخراوەکان دەڵێت "هۆکاری سەرەکیی زیادبوونی ژمارەی بازرگان و بەکارهێنەران دەگەڕێتەوە بۆ کۆنتڕۆڵنەکردنی خاڵە سنوورییەکان".

 

چیرۆکی سەرەکی: لە ساڵی 2014 کۆی گشتیی دەستگیرکراوانی ماددە هۆشبەر، تەنیا 142 کەس بوون، بەڵام ساڵی 2023 ژمارەکە بۆ چوار هەزار و 201 کەس زیادبووە.

 

لێدوانی فەرمی: سیروان گەردی، سەرپەرشتیاری گشتیی تۆڕی هەماهەنگی ڕێکخراوەکان بە ئاڤا نیوز گوت: "هۆکاری سەرەکیی زیادبوونی ژمارەی بازرگان و بەکارهێنەری ماددەی هۆشبەر دەگەڕێتەوە بۆ کۆنتڕۆڵنەکردنی خاڵە سنوورییەکان، بەتایبەت لەگەڵ ئێران".

 

ژمارەکان وادەڵێن: بەهۆی ماددەی هۆشبەرەوە، لە ساڵی 2023 لە هەولێر و دهۆک دوو هەزار و 300 کەس دەستگیرکراون. لە سلێمانی، هەڵەبجە، گەرمیان و ڕاپەڕین هەزار و 901 کەس دەستگیرکراون. لە کۆی چوار هەزار و 201 کەس کە دەستگیرکراون، هەزار و 415 کەسیان بازرگانن، بەڵام بازرگانی بچووک.

 

ئەوەی پێویستە بیزانیت: کریستاڵ پڕفرۆشتین ماددەی هۆشبەرە لە هەرێمی کوردستان، چونکە ئاسان دەستدەکەوێت و نرخەکەشی هەرزانە.

 

خاڵە ئەرێنیەکان: لەگەڵ دەستبەکاربوونی کابینەی نۆیەمی حکومەتی هەرێمی کوردستان، یەکەم یاسا لە ساڵی 2020 دەرچوو کە بە یاسای ژمارە یەکی بەرەنگاربوونەوەی ماددە هۆشبەرەکان و کارتێکەرە عەقڵییەکان دادەنرێت.