دیاردەی سواڵکردن لە عێراق زیادی کردووە

ئاڤا نیوز

لە سەرەتای ئەمساڵەوە ژمارەیەک زۆر سواڵکەر دەستگیركراون، زۆرینەی ئەو کەسانەشی سواڵ دەکەن ژن و منداڵن، بەشێكیشیان مووچەی چاودێریی کۆمەڵایەتی وەردەگرن.

وێنە گەورەکە:  دیاردەی سواڵکردن لە عێراق بەشێوەیەکی بەرچاو زیادی کردووە، بۆ کەمکردنەوەی ئەو دیاردەیەش وەزارەتی ناوخۆی عێراق بەبەردەوام هەڵمەتی دەستگیرکردنی بۆ سواڵكەرەكانی نێو شار و قەزای سەرجەم پارێزگاكان ئەنجام دەدات.

ژماره‌كان واده‌ڵین: بەپێی ئاماری فەرمی وەزارەتی ناوخۆی عێراق لە ماوەی 1-1-2024 تاوەكو 20-7-2024 تەنیا لەدیوی ڕەسافەی شاری بەغدا2291 سواڵكەر دەستگیرکراون.

ڕاگەیێنراوی فەرمی: فەریق میقداد میری، گوتەبێژی وەزارەتی ناوخۆی عێراق ڕایگەیاند: تیمەكانی پۆلێسی پارێزگاكان بەبەردەوام لەهەوڵی بنبڕكردنی دیاردەی سواڵكردنن كە لەزۆر شوێن لەڕێگەی باندی تایبەتەوە بەڕێوەدەبرێن.

زانیاريی زیاتر:  میری ئاماژەی بەوەش كرد ئەم دیاردەیە نزیكبووەتەوە لە بازرگانیکردن بە مرۆڤەوە، باندەكان كەسانی هەژار و منداڵان و هەرزەکاران بۆ داهاتی نایاسایی و سواڵکردن بەکاردەهێنن.