وەزارەتی خوێندنی باڵا وادەی کاراکردنی زانکۆلاین ئاشکرا دەکات

ئاڤا نیوز

 

ساڵانە چەندین قوتابی دوای تەواوکردنی قۆناغی دوانزەی ئامادەیی بۆ درێژەدان بەخوێندن ڕوو لە زانکۆ و پەیمانگەکان دەکەن.

 

چیرۆکی سەرەکی: وەزارەتی خوێندنی باڵا و توێژینەوەی زانستی زۆرترین دەرفەتى خوێندن بۆ دەرچووانى پۆلى دوانزەى ئەمساڵ دەڕەخسێنێت، بۆ ئەوەش بەڕێوەبەرى تۆمارى زانکۆکانى ڕاسپاردووە هەوڵ بدەن بەپێى تواناى زانکۆکانیان بە پلانى وەرگرتندا بچنەوە، بەجۆرێک کوورسى زیاتر لە بەشە زانستییەکان بۆ دەرچوانى پۆلى دوانزە تەرخان بکەن.

 

ڕاگەیێنراوی فەرمی: وەزارەتی خوێندنی باڵا و توێژینەوەی زانستی لە ڕاگەیێنراوێکدا کاتی کاراکردنی زانکۆلاین ئاشکرا دەکات و دەڵێت: دواى گەیشتنى ناو و داتاى دەرچووانى پۆلى دوانزەى ئامادەیی لە وەزارەتى پەروەردە بۆ وەزارەتى خوێندنى باڵا و توێژینەوەى زانستى، لە ئایندەیەکى نزیکدا زانکۆلاین بەڕووى دەرچووانى پۆلى دوانزە کارا دەکرێت.

 

زانیاریی زیاتر: سەبارەت بە پڕکردنەوەی فۆڕمی زانکۆلاین وەزارەتی خوێندنی باڵا داوا لە دەرچووانى پۆلى دوانزە دەکات، دوور بکەونەوە لە سەنتەرەکانى بازرگانى پڕکردنەوەى فۆڕمى زانکۆلاین، بەڵکو ڕوو لە مەڵبەندى ڕاوێژکاریی زانکۆکان بکەن بۆ یارمەتیدان و پڕکردنەوە و پێشکەشکردنى فۆڕمى زانکۆلاین بەشێوەیەکى دروست.