پرۆژەیەک بە گوژمەی  189 ملیار دینار لە قوشتەپە جێبەجێ دەکرێت

ئاڤا نیوز

سەرۆکوەزیران بارزانی ڕەزامەندی لەسەر جێبەجێکردنی پڕۆژەی ئاوی قوشتەپە و دەورووبەری بە گوژمەی زیاتر لە 189 ملیار دینار  دەربڕی، دوای تەوابوونی کێشەی کەمئاوی لە ناوچەکە بەیەکجاری چارەسەر دەکات.

وێنە گەورەکە: قەزای قوشتەپە لە پارێزگای هەولێر ساڵانی ڕابردوو کەمترین ئاستی ئاوی ژێرزەوی لێ تۆمارکراوە، بەجۆرێک لە هەندێک ناوچە قووڵی لێدانی بیر 650 مەتر بووە.

لێدوانی فەرمی: ڕێزان سەعدی، بەڕێوەبەری گشتی ئاوی دەورووبەری هەولێر بە ئاڤا نیوزی ڕاگەیاند: "سەرۆکوەزیران بارزانی ڕەزامەندی دا لەسەر پڕۆژەی ئاوی قوشتەپە کە کێشەی کەمئاوی قەزاکە و 60 گوندی دەورووبەری بەیەکجاری چارەسەر دەکات، تا مانگێکی دیکە بەردی بناغەی دادەنرێت و بە ماوەی ساڵێک پڕۆژەکە تەواو دەبێت".

بۆچی گرنگە: بە تەواوبوونی پڕۆژەکە 70 بیری ناو قەزای قوشتەپە بەیەکجاری دادەخرێن، ناوچەکە کێشەی کەمئاوی نامێنێت و ئاوی ژێرزەوی دەبووژێتەوە.

ئەوەی پێویستە بیزانیت: پڕۆژەکە بە گوژمەی 189 ملیار و 670 ملیۆن دینار جێبەجێ دەکرێت، ئاو بە بۆری لە زێی گەورە ڕادەکێشرێت و لە ڕۆژێکدا توانای بەرهەمهێنانی 72 هەزار مەتر سێجا ئاوی هەیە.

باکگراوند: ڕاگەیاندنی ئەم پڕۆژەیە 24 کاتژمێر دوای ڕاگەیاندنی پڕۆژەی فریاگوزرایی خێرایی گەیاندنی ئاوی هەولێرە، کە دوێنێ یەکشەممە لەلایەن سەرۆکوەزیران بارزانی بەردی بناغەی دانرا و کێشەی کەمئاوی هەولێر بەیەکجاری چارەسەر دەکات.