دەستەی دەستپاکی عێراق: تۆمارە دەنگییەکەی حەیدەر حەنوون ساختەیە

ئاڤا نیوز

 

دەستەی دەستپاکی عێراق ڕەتیدەکاتەوە ئەو تۆمارە دەنگییەی لە سۆشیاڵ میدیا و میدیاکان بڵاوبووەتەوە و خراوەتە پاڵ سەرۆکەکەی ڕاست بێت و دەڵێت: دەستکرد و ساختەیە.

 

وێنە گەورەکە: تۆمارێکی دەنگی بڵاوبووەتەوە و خراوەتە پاڵ حەیدەر حەنوون، سەرۆکی دەستەی دەستپاکی عێراق کە لە تۆمارییە دەنگییەکە باس لە وەرگرتنی یەک ملیار و 650 ملیۆن دینار و ئۆتۆمبێلی کادیلاک دەکات و دەشڵێت: ئەو زەوییەی ماڵەکەم لەسەر دروست کردووە پێشتر وەرمگرتووە. 

 

ڕاگەیێنراوی فەرمی: دەستەی دەستپاکی عێراق لە ڕاگەیێنراوێکدا دەڵێت: دوای بەدواداچوون و گەمارۆدانی گەندەڵکاران لەپێناو ڕادەستکردنیان بۆ دادگە، دەستیان کردووە بە جووڵاندنی سوپا ئەلیکترۆنییەکانیان و دروستکردنی ڤیدیۆی ساختە بۆ حەیدەر حەنوون.

 

زانیاریی زیاتر: دەستەکە هۆشداری دەدات بکەرانی ئەو کارە لێپرسینەوەی قورسیان لەگەڵدا دەکرێت. 

 

ئەوەی پێویستە بیزانیت: لە ڕۆژی چوارشەممە 11ـی ئەیلوولی 2024 ئەنجوومەنی باڵای دادوەریی عێراق ڕایگەیاند، دەست بە لێکۆڵینەوە لەگەڵ سەرۆکی دەستەی دەستپاکی دەکرێت بەتۆمەتی گەندەڵیکردن و وەرگرتنی بەرتیل.