خوێندنەوەی دووەم بۆ هەمواری یاسای باری کەسی و لێبوردنی گشتی دەکرێت

ئاڤا نیوز

 

پەرلەمانی عێراق خوێندنەوەی دووەمی بۆ هەردوو پڕۆژەیاسای هەمواری یاسای باری کەسێتی و لێبووردنی گشتی کرد، یەکەمیان خواستی شیعەکان و دووەمیشیان خەونی لەمێژینەی سوننەکان بوو.

 

وێنەگەورەکە: سەرەڕای ناڕەزایی ڕێکخراوەکانی کۆمەڵگەی مەدەنی و ژنان، بەڵام شیعەکان چەند مانگێکە داوای هەمواری یاسای باری کەسێتی دەکەن، سوننەکانیش بە بەڵێنی دەرچوواندنی یاسای لێبووردنی گشتی بەشداری حکومەتی سوودانییان کردووە، لەبەرامبەریشدا کورد داوای پەسەندکردنی پرۆژەیاسایەک دەکات کە بەهۆیەوە مووڵک و زەوی لە کەرکووک و ناوچە کوردستانییەکانی دەرەوەی ئیدارەی هەرێمی کوردستان بۆ خاوەنەکانیان دەگەڕێتەوە.

 

ڕاگەیێنراوی فەرمی: ڕاگەیاندنی پەرلەمانی عێراق بڵاویکردەوە، لە کۆبوونەوەی ئەمڕۆیدا کە بە ئامادەبوونی 180 پەرلەمانتار بەڕێوەچوو، پەرلەمان خوێندنەوەی دووەمی بۆ هەردوو پڕۆژەیاسای هەمواری یاسای باری کەسێتی و لێبووردنی گشتی کرد.