بەهۆی هەڵواسینی پۆستەری بەربژێرێکی یەکێتی مێردمنداڵێک گیان لەدەست دەدات

ئاڤا نیوز

 

بەرەبەیانی ئەمڕۆ مێرمنداڵێک کە بەهۆی هەڵواسینی پۆستەری بەربژێرێکی یەکێتی بەسەختی بریندار ببوو، دوای دوو ڕۆژ مانەوە لە نەخۆشخانە گیانی لەدەست دا.

 

چیرۆکی سەرەکی: ئێوارەی ڕۆژی هەینی 27-09-2024 لە نزیک کۆمەڵگەی پیرزین لە شاری هەولێر دوو برا لەکاتی هەڵواسینی پۆستەری بەربژێرێکی یەکێتی بە تاوەرێکی کارەبا، دەچنە سەر سەبەتە(سەلە)ـی ئۆتۆمبێلێک، لەو کاتەدا بارهەڵگرێک خۆیان پێدا دەکێشێت، بەهۆیەوە هەردووکیان دەکەون بریندار دەبن، ئەمڕۆ دووشەممە یەکێکیان گیانی لەدەست دا.

 

زانیاریی پەیامنێر: عوبەید بەشار، پەیامنێری ئاڤا لە هەولێر گوتی، "کاتژمێر 05:00ـی بەرەبەیانی ئەمڕۆ دووشەممە، ئەحمەد ئیسماعیل، مێرمنداڵێکی 13 ساڵانە بەهۆی سەختی برینەکەیەوە گیانی لەدەست داوە، براکەی کە هەردوو قاچی شکاوە بریندارە و لە نەخۆشخانەیەکی شاری هەولێر چارەسەر وەردەگرێت."

 

ئەوەی پێویستە بیزانیت: ماوەی چوار ڕۆژە بانگەشەی هەڵبژاردنی خولی شەشەمی پەرلەمانی کوردستان دەستیپێکردووە و بڕیارە تاوەکو 15-10-2024 بەردەوام بێت.