دوای 10 ساڵ جارێکی دیکە کارکردن لە توونێلی بەنی هەریر دەستپێدەکاتەوە

ئاڤا نیوز

 

دوای نزیکەی 10 ساڵ وەستانی کارەکانی توونێلی بەنی هەریر، بە فەرمانی سەرۆکوەزیران مەسرور بارزانی کارکردن لە توونێلەکە دەستپێدەکاتەوە.

 

وێنە گەورەکە: لە ساڵی 2014 دەست بە جێبەجێکردنی پرۆژی توونێلی بەنی هەریر کرا، بەڵام قەیرانی دارایی ڕێگر بوو لە بەردەم جێبەجێکردنی، ئێستا دوای 10 ساڵ لە وەستانی کارکردن تیایدا، بە فەرمانی سەرۆکوەزیران مەسرور بارزانی جارێکی دیکە بەڕێوەبەرایەتیی گشتیی ڕێگاوبان و ئاوادەنکردنەوەی هەولێر کارکردن لە پرۆژەکە دەستپێدەکاتەوە.

 

لێدوانی فەرمی: ئەندازیار هونەر نووری، بەڕێوەبەری گشتیی ڕێگاوبان و ئاوەدانکردنەوەی هەولێر بە ئاڤا نیوزی گوت: ئێستا هەڵسەنگاندن و دووبارە دیزاینکردنەوە بۆ توونێلی بەنی هەریر دەکەین، لە داهاتوویەکی نزیک دەست بە تەواوکردنی کارەکانی ئەم پرۆژەیە دەکەین.

 

شێوازی جێبەجێکردنی: لەگەڵ دەستپێکردنەوەی کارەکانی پرۆژەکە لە توونێلی بەنی هەریر تاوەکو چواڕیانی مامەجەلکە بە درێژیی 3 هەزار و 600 مەتر توونێلەکە بە ڕێگای هاملتۆن دەبەسترێتەوە، لەلایەکەی دیکەوە بە درێژیی 250 مەتر توونێلەکە بە ڕێگای بالیسان-خەلیفان دەبەسترێتەوە.

 

زانیاریی زیاتر: توونێلی بەنی هەریر درێژییەکەی 3 هەزار 650 مەترە و 50%ـی کارەکانی جێبەجێ کراوە، پارێزگای هەولێر بە هەردوو ئیدارەی سەربەخۆی ڕاپەڕین و سۆران دەبەستێتەوە.