چوارچێوەى هەماهەنگى بە زۆرینە پۆستی سەرۆکی پەرلەمان یەکلایی دەکاتەوە

ئاڤا نیوز

 

ئەمڕۆ چوارشەممە، چوارچێوەی هەماهەنگی پاڵپشتی تەواوی خۆی بۆ مەحموود مەشهەدانی بۆ سەرۆکایەتی پەرلەمانی عێراق دەربڕی، وادەی دانیشتنی بۆهەڵبژاردنیشی ئاشکرا کرد.

 

وێنە گەورەکە: زیاتر لە 11 مانگە محەممەد حەلبووسی، بە بڕیاری دادگای فیدراڵی لە پۆستی سەرۆکی پەرلەمان دوورخراوەتەوە، لەوکاتەوە سوننەکان بەهۆی ناکۆکی نێوانیان نەیانتوانیوە کەسێک وەک جێگرەوەی هەڵبژێرن و پۆستەکەش تائێستا بەوەکالەت بەڕێوەدەبرێت.

 

لێدوانی فەرمی: عەلی فەتلاوی، پەرلەمانتاری عێراق لە چوارچێوەی هەماهەنگی ڕایگەیاند: سەرجەم هێزە سیاسییەکانی نێو چوارچێوەی هەماهەنگی، ڕێککەوتن لەسەر پاڵپشتیکردن لە مەحموود مەشهەدانی بۆ سەرۆکایەتی پەرلەمانی عێراق، 22 یان 23  ئەم مانگەیان دیاری کرا وەک وادەیەک بۆ ئەنجامدانی دانیشتنی هەڵبژاردنی مەشهەدانی.

 

لەلایەکی دیکەوە: فەتلاوی ئاماژەی بەوەش کرد، چوارچێوەی هەماهەنگی سورە بەزۆرینەی ئەندامانی پەرلەمان ئەو پۆستە لە بەرژەوەندی مەشهەدانی لەوادەی دیاریکراوی خۆیدا یەکلایی بکاتەوە، تەنانەت ئەگەر بەشێکیش لە لایەنە سوننەکان بایکۆتی دانیشتنەکە بکەن. 

 

باکگراوند: ڕۆژی 14-11-2023، دادگای باڵای فیدراڵی عێراق لە بڕیارێکدا کۆتایی بە ئەندامێتی محەممەد حەلبووسی، سەرۆکی ئەنجوومەنی نوێنەرانی عێراق هێنا.