شارەوانی سلێمانی: پاککردنەوەی ناوەندەکانی دەنگدان ئەرکی ئێمە نییە

ئاڤا نیوز

 

دوای تەواوبوونی پرۆسەی دەنگدان، لە سەرجەم شارەکان پرۆسەی خاوێنکردنەوەی ئەو قوتابخانانە دەستپێدەکات کە وەک ناوەندی هەڵبژاردن بەکارهێنراون، شارەوانی سلێمانی دەڵێت 'پاککردنەوەی ناوەندەکانی دەنگدان ئەرکی ئێمە نییە و ئەرکی قوتابخانەکانە'.

 

وێنە گەورەکە: ڕۆژی 20-10-2024، پرۆسەی هەڵبژاردنی گشتیی خولی شەشەمی پەرلەمانی کوردستان بەڕێوەچوو.

 

لێدوانی فەرمی: زەردەشت ڕەفیق، وتەبێژی شارەوانی سلێمانی بە ئاڤا نیوزی ڕاگەیاند: ڕۆژانە هەڵمەتی پاککردنەوەی گەڕەکەکانمان هەیە، ئەو گەڕەکانەی ناوەندەی دەنگدانیان تێدا هەیە پاکیان دەکەینەوە، بەڵام پاککردنەوەی ئەو قوتابخانانەی بۆ هەڵبژاردن بەکارهێنراون ئەرک و بەرپرسیارێتی ئێمە نییە.

 

وتەبێژی شارەوانی سلێمانی دەڵێت: " نزیکە 500 قوتابخانە کراوەتە ناوەندی دەنگدان، پاککردنەوەی ئەرکی قوتابخانەکەیە و هی ئێمە نییە تاوەکو خاوێنی بکەینەوە".

زانیاریی زیاتر: بەگوێرەی یاسای کۆمیسیۆنی هەڵبژاردنەکان، 30 ڕۆژ دوای بەڕێوەچوونی پڕۆسەی هەڵبژاردن، ئەگەر کاندید و لایەنە سیاسییەکان پۆستەر و ڕیکلامەکانیان لێنەکەنەوە، ئەوا لێپێچینەوەیان لەگەڵ دەکرێت، وتەبێژی شارەوانی سلێمانیش ئاماژە بەوە دەکات 'دوای 30 ڕۆژەکە وەک شارەوانی پۆستەر و ڕیکلامەکان لادەبەین، بەڵام تێچووی کارەکان لە لایەنە سیاسییەکان وەردەگرینەوە، چونکە ئەو کارە بە پارە دەکەین'.