بازرگانێکی نێودەوڵەتیی ماددەی هۆشبەر لە عێراق دەستگیر کرا

ئاڤا نیوز

وەزارەتی ناوخۆی عێراق دەستگیرکردنی بازرگانێکی نێودەوڵەتیی ماددەی هۆشبەر بە بڕێکی زۆر ماددەی کریستال ڕادەگەیێنێت.

چیرۆکی سەرەکی: بازرگانەکە لە نێوان پارێزگاکانی واست و میسان لەلایەن هێزەکانی پاسەوانی سنوور دەستگیرکراوە، کە هەوڵی داوە 25 کیلۆگرام ماددەی هۆشبەر لە جۆری کریستال بێنێتە نێو عێراق.

لێدوانی فەرمی: عەمید میقداد میری، گوتەبێژی وەزارەتی ناوخۆی عێراق ڕایگەیاند، ئۆپەراسیۆنەکە لەلایەن بەڕێوەبەرایەتیی گشتیی کاروباری ماددە هۆشبەرەکان و کارلێکەرە دەروونییەکان بە هاوکاری فەرماندەیی هێزەکانی پاسەوانی سنوور کراوە، بەڵام هیچ ئاماژەیەکی بە ناسنامەی بازرگانەکە نەکردووە .

لەلایەکی دیکەوە: هەر ئەمڕۆ پۆلیسی بابل دەستگیرکردنی سێ تۆمەتباری بە هەزار پارچە حەپـی "کاپتاگۆن"ەوە ڕاگەیاند.