مونا قەهوەچی: داواکارین بەگوێرەی کورسی مامەڵە لەگەڵ تورکمانەکان نەکرێت

ئاڤا نیوز

 

پێکهاتەی تورکمانەکان داواکارن بەگوێرەی کورسییەکانیان مامەڵەیان لەگەڵ نەکرێت، کاندیدێکی دەرچووی پێکهاتەکەش دەڵێت "پرۆژە و داواکارییەکانمان ئامادەن و چاوەڕوانی سەردانی لایەنەکانی پێکهێنەری حکومەتین تاوەکو ڕادەستیان بکەین".

 

وێنە گەورەکە: هەوڵەکان بۆ کۆبوونەوەی پەرلەمان و پێکهێنانی کابینەی 10ی حکومەتی هەرێمی کوردستان بەردەوامە، چاوەڕوان دەکرێت لەم هەفتەیەوە گفوگۆی نێوان لایەنە براوەکانی هەڵبژاردن لەوبارەیەوە بەچڕی دەستپێبکەن.

 

لێدوانی فەرمی: مونا قەهوەچی، کاندیدی دەرچووی پێکهاتەی تورکمان، بە ئاڤا نیوزی گوت: پرۆژە و داواکارییەکانمان ئامادە کردووە و چاوەڕوانی سەردانی لایەنە پێکهێنەرەکانی حکومەتین بۆ ئەوەی بەشێوەیەکی فەرمی ڕادەستیان بکەین.

 

مونا قەهوەچی گوتیشی: داوا دەکەین بە ژمارەی کورسییەکان مامەڵەمان لەگەڵ نەکرێت، بەشداری کارای تورکمانەکان سیما و کولتووری پێکەوە ژیانی نێوان پێکهاتەکان جوانتر و بەهێزتر دەکات.

 

ئەوەی پێویستە بیزانیت: هاوشێوەی خولی پێشوو پێکهاتەی تورکمانەکان داوا دەکەن، لە خولی شەشەمی پەرلەمانی کوردستان پۆستی یەکێک لە ئەندامانی دەستەی سەرۆکایەتی پەرلەمانیان پێ بدرێتەوە.