ئاشوورییەکان هەڕەشەی بایکۆتکردنی هەڵبژاردنی پەرلەمانی کوردستان دەکەن

ئاڤا نیوز

کاردانەوەی پێکهاتەکان بەرامبەر بڕیارەکەی دادگای فیدراڵی بەردەوامە. سەرۆکی هاوپەیمانیی ئاشووری دەڵێت "بڕیارەکە ڕەوا نییە و بەمشێوەیە بەشداری هەڵبژاردن ناکەین."

وێنە گەورەکە: بڕیارەکەی دادگای فیدراڵی عێراق بۆ هەڵوەشاندنەوەی کورسی کۆتاکان لە پەرلەمانی کوردستان، کاردانەوەی تووند و فراوانی لێکەتووەوە و پێکهاتەکان نیگەران و ناڕازین. 

لێدوانی فەرمی: یونادم کنا، سەرۆکی هاوپەیمانیی ئاشووری بە ئاڤا نیوزی گوت: "چاوەڕێین دادگای فیدراڵی چاوێک بە بڕیارەکەیدا بخشێنێتەوە، ناکرێت لە عێراق کورسی بۆ کۆتاکان هەبێت، بەڵام لە کوردستان هەڵبووەشێنرێتەوە."

یونادم کنا جەختی کردەوە، ئەگەر بەمشێوەیە بێت لە پرۆسەکە دەکشێنەوە و بەشداری لە هەڵبژاردنی خولی شەشەمی پەرلەمانی کوردستان ناکەن.

لەلایەکی دیکەوە: ڕۆمیۆ هەکاری، سکرتێری گشتیی پارتی دیموکراتی بێت نەهرێن کە پارتێکی کریستانە، پێشتر بە ئاڤا نیوزی گوتبوو، لە هەموو دۆخێکدا خۆیان لەگەڵ بڕیارەکە دەگونجێنن.

هاوکات ئایدن مەعرووف، سەرکردە لە بەرەی تورکمانی عێراقی، لە لێدوانێکدا بۆ ئاڤا نیوز هەرچەندە بڕیارەکەی بە سیاسی دانا، بەڵام گوتی بەشداریی هەڵبژاردن دەکەن.