ئومێد سەباح: پارتی لەسەر ڕاسپادەی سەرۆک بارزانی سەردانی هەموو حیزبەکان دەکات

ئاڤا نیوز

 

دوای تەواو بوونی ڕێکارەکانی کۆمیسیۆنی باڵای سەربەخۆی هەڵبژاردنەکانی عێراق، پارتی دیموکراتی کوردستان سەردانی حیزبەکان دەکات بۆ گفتوگۆکردن لەسەر پێکهێنانی حکومەتی نوێی هەرێمی کوردستان.

 

لێدوانی فەرمی: د. ئومێد سەباح، سەرۆکی دیوانی ئەنجوومەنی وەزیرانی هەرێمی کوردستان ڕاگەیاند: پارتی دیموکراتی کوردستان وەکو حیزبی براوەی یەکەمی هەڵبژاردن و لەسەر ڕاسپاردەی سەرۆک بارزانی لیژنەیەکی پێکهێناوە، بۆ گفتوگۆی پێکهێنانی حکومەت سەردانی هەموو حیزبەکان بکەن.

 

بابەتی ستراتیژی: سەرۆکی دیوانی ئەنجوومەنی وەزیران ئەوەشی خستەڕوو، "دوای گفتوگۆکردن لەگەڵ لایەنەکان لە چوارچێوەی یاساکانی هەرێمی کوردستان هەنگاو دەنێین بۆ پێکهێنانی کابینەی نوێی حکومەتی هەرێمی کوردستان".

 

لەلایەکی دیکەوە: د. ئومێد سەباح ڕایگەیاند، دوای ئەوەی هەموو تانەکان یەکلایی دەکرێنەوە، ئەنجوومەنی کۆمیسیارانی کۆمیسیۆن ئەنجامی هەڵبژاردن پەسەند دەکات، بڕیاری دەستەی دادوەریی دەربارەی تانەکان پابەندییە بۆ کۆمیسیۆن و لیست و حیزب و بەربژێرەکان.