داعش بەرپرسیارێتی خۆی لە تەقینەوەکەی خورماتوو ڕادەگەیێنێت

ئاڤا نیوز

 

ڕێکخراوی داعش بەرپرسیارێتیی خۆی لە تەقینەوەکەی دوێنێی سنووری خورماتوو ڕاگەیاند، کە لە ڕێگەی بۆمبێکی چێنراوەوە هێزێکی هاوبەشی هێزەکانی پێشمەرگە و سوپای عێراقی بە ئامانج گرت، لە ئەنجامیشدا دوو فەرماندە و پاسەوانێکیان شەهید ببوون.

 

وێنە گەورەکە: بۆمبێكی چێنراو بە ئۆتۆمبێلێکی لیوای یەکی هاوبەشی هێزەکانی پێشمەرگە و سوپای عێراق لە ناوچەی غەڕڕەی خورماتوو تەقییەوە، لە ئەنجامیشدا دوو فەرماندە بەناوەکانی عەقید روکن سامان و عەقید محەممەد، لەگەڵ یەکێک لە پاسەوانەکانیان شەهید بوون.

 

لێدوانی فەرمی: ئاژانسی ئەعماق کە دەزگای پڕوپاگەندەی ڕێکخراوی داعشە بڵاویکردەوە، داعش بەرپرسیارێتی خۆی لە هێرشەکەی خورماتوو لە ئەستۆ گرت کە بەهۆیەوە دوو ئەفسەری پلە باڵا و سەربازێک شەهیدبوون و سێ سەربازی دیکەش برینداربوون.

 

زانیاریی زیاتر: ئەو هێزە هاوبەشەی لە خوورماتوو کرانە ئامانج لە چوارچێوەی کاری پێکەوەیی هەردوو حکومەتی هەرێمی کوردستان و حکومەتی عێراق لەناوچەکانی سنووری ماددەی 140 بڵاوەیانپێکراوە، بەمەبەستی پڕکردنەوەی بۆشایی ئەمنیی لەو سنورانەدا کە گوومان دەکرێت داعش وەک بۆشاییەک بۆ خۆڕێکخستنەوە بەکاریانبهێنێت.