وەزارەتی تەندروستی سەبارەت بە ڕۆژانی سەرژمێری چەند بڕیارێك دەردەکات

ئاڤا نیوز

 

وەزارەتی تەندروستیی حكومەتی هەرێمی كوردستان بە مەبەستی پێشکەشکردنی ڕێنمایی و خزمەتگوزاریی تەندروستیی بۆ کارئاسانی و خزمەتکردنی هاونیشتمانیان لە ڕۆژانی پشووی سەرژمێری، جەخت لەسەر چەند خاڵێک دەكاتەوە و چەند بڕیارێکیش دەدات.

 

ڕاگەیێنراوی فەرمی: وەزارەتی تەندروستی ڕایگەیاند: "لە ڕۆژانی پشووی سەرژمێری، لە کاتی پێویستدا کۆگاکانی دەرمان و پێداویستی پزیشکی و تاقیگەیی کراوە دەبن لە سەرجەم شار و شارۆچکەکان، هاوكات لیژنەیەكی بەدواداچوون لەسەرجەم بەرێوەبەرایەتیی گشتی و نەخۆشخانەکان پێكدەهێنرێت، هەوەرها دەبێت پزیشكانی پسپۆر، نیشتەجێی دێرین و خولاو، پەرستار و کارمەندانی تەندروستی پابەند بن بە دەوامی ئێشکگری.

 

لەلایەكی دیكەوە: وەزارەتی تەندروستی بڕیاری داوە كە ئەمبوڵانسەكان بە باشی ئامادە بكرێن و گاز و بەنزینیان بۆ دابین بكرێت، هاوكات نەخۆشخانەکانی فریاکەوتن و نۆرینگە دەرەکیەکان کراوە دەبن و هەموو سەردان و زانیارییەکان تایبەت بە نەخۆش تۆمار دەكرێن، هەروەها سەنتەرەكانی پێدانی چارەسەری كیمیاوی بۆ نەخۆشانی شێرپەنجە بە شێوەی ئێشگكری كراوە دەبن.

 

ئەوەش بزانە: بەپێی بڕیارەكانی وەزارەتی تەندروستی، تیمەكانی فریاگوزاری و هێڵی 122 بەردەوام دەبن لە ئەرك و كارەكانیان بە شێوەی 24 كاتژمێری، هاوكات دەبێت دابینكردنی خزمەتگوزاریی تەندروستی بۆ ئاوارەکان لە کەمپەکان بەردەوام دەبێت.