جۆ بایدن: لە هەوڵداین ئاگربەست لە غەززەش بکرێت

ئاڤا نیوز

ئەمریکا لە هەوڵدایە لەدوای ڕاگەیاندنی ئاگربەست لە لوبنان، لە غەززەش ئاگربەست لەنێوان ئیسرائیل و حەماس بکرێت.

لێدوانی فەرمی: جۆ بایدن، سەرۆكی ئەمریكا ڕایدەگەیێنێت، لە ڕۆژانی داهاتوودا  لەگەڵ تورکیا، میسر، قەتەر، ئیسرائیل و ئەوانی دیکە هەوڵێکی تر دەدات بۆ گەیشتن بە ئاگربەست لە غەززە، ئەویش بە ئازادکردنی بارمتەکان و کۆتاییهێنان بە شەڕ، بە مەرجی نەمانی دەسەڵاتی حەماس.

ئەوەی لەبارەیەوە دەوترێت: لەگەڵ ڕاگەیاندنی ئاگربەست لە نێوان ئیسرائیل و حیزبوڵڵای لوبنان، حەماس ستایشی ئاگربەستی لوبنانی کرد، بەرپرسێکی باڵای بزووتنەوەی حەماس لە ڕاگەیێنراوێکدا لەبارەی ئاگربەستی غەززەوە ڕایگەیاند: "تورکیا، قەتەر و میسر ئاگادارن لەوەی کە حەماس دەیەوێت ڕێککەوتن ئەنجامبدات بۆ ئاگربەست لە غەززە، "بەڵام ئیسرائیل ڕێگری لە گەیشتن بەم ڕێککەوتنە دەکات".

باگکراوند: دوای 60 ڕۆژ لە شەڕ، بە هەوڵی ئەمریکا و فەرەنسا،  ئیسرائیل بۆ ماوەی دوو مانگ ئاگربەستی لەگەڵ حیزبوڵڵای لوبنان پەسەند کرد و ئەمڕۆ جێبەجێ کرا و شەڕ ڕاگیرا. لە غەززەش 14 مانگە شەڕ بەردەوامە و تاوەکو ئێستا زیاتر لە 44 هەزار کەس کوژراون و دەیان هەزاریش بریندارن.